Luis Redondo. Una vida na LLUCHA

Dende'l C.S.A. La Semiente queremos collaborar a esparder la memoria y l'espiritu de llucha y compromisu de clase de Luis Redondo.
El nuestru pésame pa la familia y pa los/es compañeros/es de llucha durante estos años y concretamente a la C.S.I..

Reproducimos equí una pequeña reseña biográfica que les compañeres del sindicatu qu'él mesmu fundó, la Corriente Sindical d'Izquierda d'Asturies, asoleyó sobre la so persona:

Güei, martes 22 d’ochobre, finó nel Hospital de Cagüeñes Luis Redondo Alvarez “Redondo”, primer Secretariu Xeneral de la Corriente Sindical d’Izquierda.

Dende la primer hora la terdi, allugaráse la capilla ardiente na Casa Sindical de Xixón, asitiada na cai Sanz Crespo 3. Posteriormente, a les 20:00 h., realizaráse un actu d’homenxe y despedía, cola intervención del Secretariu Xeneral de la CSI d’anguañu, Samuel Fernández. A la fin, entamaráse una caravana coches p’acompañar a Luis Redondo hasta’l tanatoriu.

Luis Redondo nació en Turón (Mieres) un mes d'avientu nuna familia humilde, obrera y comunista, que tuvo que treslladase a Xixón cuando él inda yera un neñu, asitiándose n'El Natahoyo, barriu marcáu pola industrialización, la esperiencia fabril y naval, la vida en comunidá y la llucha.

Redondo definíase como marxista-leninista, comunista, atéu y estudiosu de les relixones. Foi autodidacta, llector de los filósofos griegos y de Freud, aficionáu al boxéu (deporte que practicó), a la música clásica y siguidor de los profesores Emilio Alarcos y Gustavo Bueno. Estudió colos Hermanos de La Salle, colos qu'alquirió conocencies y un gran interés cultural, hasta que tuvo que ponese a trabayar a los 13-14 años. Primero foi pinche nuna tienda, dempués trabayó na construcción hasta que llegó a la metalurxa, entrando d'aprendiz na fábrica onde trabayaba'l so pá, Talleres de Moreda. Ellí aprendió l'oficiu soldador, categoría llaboral cola que percorrió la mayoría los centros industriales d’Asturies, casi siempres como eventual, dáu'l so compromisu políticu.

Ente llucha y llucha conoció a la so compañera Beni, cola que tuvo cuatro fíos que-yos dieron unos nietos a los qu'últimamente se dedicaba con chulería y arguyu de güelu.

El nome de Redondo ta venceyáu a les lluches, movilizaciones y fuelgues xenerales de los seutores de la naval y la metalurxa n’Asturies. Per onde él pasaba quedaba un rastru de fuelgues, comprometíu como taba colos derechos de les y los trabayadores. Trabayó en tolos estelleros de la bahía xixonesa y foi despidíu de toos ellos. Nos trés últimos trabayos foi despidíu en menos d'una hora, “nel dique Duro Felguera, despídenme al cuartu d'hora”, dicía. Esa yera, y sigue siendo, la resultancia d'engarrar polos drechos llaborales y políticos, tener que dir de trabayu en trabayu, despidu tres despidu, siendo, xunta otros compañeros, un “nómada” llaboral”, y pasando dómines d'apuros económicos, como comentaba en numberoses ocasiones. A él nunca-y llegó l'amnistía llaboral. Tamién, pa neutralizar el so trabayu políticu y la so actividá axitadora, foi deteníu en munches ocasiones. Yeren, como lo llamen agora, detenciones “preventives”. Nunca delató a naide, nin robló los interrogatorios, dicía que nun-ylo dexaba la so concencia moral. Toes estes torgues, antes d'acobardalu, diéron-y más puxu pa lluchar.

Esti compromisu que dende mozu tuvo cola llucha de los y les trabayadores fíxo-y participar viviegamente na clandestinidá nel PCE y CCOO. En 1978 foi escoyíu Secretariu Xeneral de Xixón, d'esta última organización, nel mesmu congresu nel qu'él y la mayoría de militancia de la so fastera pronunciáronse a la escontra los Pactos de la Moncloa: “Teníamos que tar a la escontra los Pactos de la Moncloa y la Constitución por responsabilidá política y social, porque yera una traición nidia a la clas obrera”. Ende entamó'l procesu que lu llevaría a ser espulsáu de CCOO y PCE en 1981. Funda entós, con otros compañeros y compañeres la Corriente Sindical d’Izquierda. Cansaos d'engarrar contra'l burocratismo, l'ordeno y mandu, l'alloñamientu y traición a les bases, les poltrones, les espulsiones, la negación del asamblearismu como forma de tomar decisiones y de lluchar, pescancien qu'hai otra forma de faer sindicalismu y trabayu políticu. Como él mesmu diz n'ún de los sos testos: “En dichu coleutivu sindical creo que ta'l núcleu más arrogante tocantes a entrega sindical, vocacional y con más sentíu revolucionariu y menos egoísmu qu'hai nes organizaciones sindicales, anque primeramente esta organización fuera llamada horda sindical, exércitu de Pancho Villa, inorgánicos, aventureros, gasolineros y terroristes. Esti núcleu foi primeramente refugáu poles instituciones n’Asturies, amás de polos axentes sociales y políticos. Influyó esti fechu n'acentuar la fisonomía propia y evitar contaminaciones pernicioses, al marxe, evidentemente, del factor más importante, que ye'l calter vocacionalmente estremáu como sentimientu mayoritariu d'esta organización; sobremanera nos mecanismos de defensa pa caltener los puestos de trabayu, el ser solidariu colos eventuales y los paraos y el calter asistencial y meticuloso de la so asesoría xurídico y sindical colos pequenos talleres, paraos y les rames más desprotexíes”.

Redondo desplicaba qu'hai dos maneres de concebir el mundu, “la que pasa por salvase ún solu o la de salvanos toos”. Dicía que'l capitalismu ficiéralo perbién, que fueron individualizándonos, faciéndonos competir ente nós, perdiendo asina “l'alma coleutiva de clas”.

“Humanismu cristianu dende l'ateísmu, compromisu solidariu y llucha contra la inxusticia social” son carauterístiques d'un home bonu, compañeru y militante enfotáu, del que munchos y munches tamos arguyosos y arguyoses.

Redondo foi Secretariu Xeneral de la Corriente 16 años, y dempués militante activu, dando al sindicatu una personalidá propia. La Casa Sindical, como diz la so familia, foi la so primer casa. Poro, la nuesa primer despidía va ser ende. Na so casa, na casa de la clas obrera, acompañáu de la so familia y de los sos compañeros y compañeres.