viernes, 13 de julio de 2012

Última actividá. Hasta la Seronda!

Llega'l vranu, y ante la marcha de mucha xente tanto de la que trabaya nel centru social (que tamién tien que descansar daqué), como del pueblu y del conceyu, facemos un paronin, pa garrar fuerzes y volver na seronda coles idees más fresques y con otres actividaes, que dende darreu entamamos a preparar.

Pa trancar, vamos facelo con una folixa, en concordancía coles Fiestes de La Llaguna de L'Entregu, pensamos que podemos volver a cellebrar la presencia de esti centru social nel pueblu, y cola necesidá d'autofinancianos y autoxestionanos, además de pasalo per bien, güei tendremos la actuación del grupu de rap combativu K-Nalón, que xugando en casa (los sos integrantes son miembros del colectivu), de xuru que nos muestren un buen espectaculu coles sos rimes. 

 Pero debemos decir que la falta d'actividaes del centru, nun quier decir que nun vayamos facer ná, ya que como vemos nestos díes, les movilizaciones y les demostraciones de fuerza nun puen cesar ante estos duros ataques represivos, políticos, económicos y de derechos, que la clas trabayaora y el conxuntu de la sociedá del Estau Español ta recibiendo por parte del capitalismu, coles grandes fortunes y los políticos al frente, y mismamente esti Sabadu 14 vamos tar na Marcha Negra organizá xunto a otros colectivos en Xixón a partir de les 17 la tarde, y que sal de la empresa Apta, na zona'l Piles.

martes, 10 de julio de 2012

Alambique en La Semiente. "Despacito y por la orilla"


Esta selmana'l Centru Social La Semiente fai un descansu hasta la seronda con dos ultimes actividaes. Per un sitiu el xueves día 12 a les 20:00h va tener llugar la presentación del trabayu “Despacito y por la orilla”:”Reflexiones sobre movilización social y lucha contra la exclusión desde Asturies" que va correr al cargu del sos autores l'Asociación contra la esclusión ALAMBIQUE. Un trabayu editáu por Zambra, Baladre y Libreando Ediciones.Un testu que recueye delles reflexones sobre la situación actual d'Asturies, dellos documentos del colectivu nos que cavilga sobre la movilización social y sobre el trabayu realizáu na so última campaña y una propuesta pa tresformar la sociedá.

El vienres y coincidiendo coles fiestes locales de La Llaguna, va haber un conciertu del grupu de hip hop combativu K-Nalón, que xueguen en casa yá que son miembros del propiu colectivu La Semiente. Les puertes van tar abiertes a partir de la 20:30H y animen a tolos amigos del Centru Social y a la xente en xeneral a pasar un ratu en compañía, tomando daqué pa despidir les actividaes hasta la seronda. El conciertu va empezar a les 21:30H.

Sicasí'l Centru Social la Semiente anuncia que suspenden les sos actividaes dientro del centru: charres, esposiciones, ciclu de cine, talleres..., pero que siguieren activos na cai participando de les protestes sociales y promoviendo nueves campañes, porque anque'l centru fuelgue, la llucha nun tien de cesar, como nun cesen les falcatrúes de los politicos y los responsables del sistema financieru internacional, responsables de la situación que sufre'l pueblu.