martes, 31 de enero de 2012

Gon, la meyor de les sonrises.

Ye dificil empezar un testu pa falar d'esos golpes duros que dá la vida, nun se sabe per onde garralo y ye que nun ye facil. Pero queriemos desde esti requexu que La Semiente tien na rede, contribuir a recordar la presencia de Gonzaga nes nuestres vides.Toles persones somos esenciales y especiales na vida de la xente que nos arrodia y Gonzaga yera d'esos, de los que más. Y queda claro estos dies, porque allá per onde pasó dexó un buen sabor, dexó una actitud vital desbordante y y una forma de ver la vida especial. Son munches les amigues y amigos que dende Asturies a Ponferrada dende Madrid a Mallorca lo ven así.
Gon yera el responsable del cine-forum de La Semiente. Ye'l responsable de que munchos veamos el cine con otros güeyos, ye'l responsable de descubrinos vieyes y nueves xoyes del cine. Ye'l responsable de que falemos de los pequeños y grandes detalles qu'una pelicula o simplemente una escena encierren. Y ye que currábaselo, preocupábase non solo de poner una pelicula, sino d'enmarcanos nel contestu hestoricu y social d'aquello que diva compartir con nós. Disfrutaba compartiendo una de les sos grandes pasiones, el CINE. Yera un gran amante del cine, de la música..., facia filigranes con una cámara fotos y maravilles con un movil, y ye que desbordaba creatividá per tolos astiales.
Si algo yera especial nel nuestru amigu yera la so sonrisa, la so actitú, el so culu inquietu, la so enerxia, la so actividá... Too éso ye la so semiente, la semiente que dexó en toes y ca una de nosotres y nosotros, esa semiente que tien que siguir xerminando, biltando y medrando dientro de nós.
Queremos que la su sonrisa tea siempre activa nel presente y nel dia a dia de toes y de toes. Nun hai meyor semiente qu'esa, asina que ye cuestión nuestra siguir regándola tolos dies un poco.



Dende La Semiente queremos compartir un abrazu multitudinariu con Vero, con Pinchu, con Elia, con Yon, con Mario, con Elia (Madre) con Mario (Padre), con tola so familia y con toles sos amigues y amigos.
Un dia d'estos brindaremos por él con una buena cerveza Caleya na mano. 
Salú!

martes, 10 de enero de 2012

Xineru - "Consumu cuidau"

 Equí ta la nueva programación pa esti primer mes del 2012.

Tras les fiestes del pasau mes, somos munchos los que renegamos d'esa fiebre consumista que practicamente imponennos, agora dicen que vien la cuesta Xineru, y que hai que amarrase'l cinturón, en fín...

Esta ye una de les causes de la temática d'esti mes, el consumu xustu y la alimentación saludable y respetuosa.

Y ye que nesti centru social, ta viltiendo una nueva semiente, que ye la de formar un grupu de consumu, pa intentar nun caer nesta trampa'l sistema y ser más respetuosos con lo que mercamos, tanto con los que nos lo venden, como pa nosotros y les nueses families, como pa la humanidá en xeneral (obreros explotaos, exterminiu de les actividaes de subsistencia clasiques d'algunos pueblos, ...)

Así con estes charres queremos que la xente que pueda tar interesao (incluios nosotros), se informe sobre les alternatives, el porqué del consusmu xustu, etc.

Pero nel Centru Social "La Semiente", nun nos queremos cerrar a un solu tema, así seguiremos col ciclu de cine, los Miercoles que nun haya otres actividaes y tamién esti mes tará disponible pa güeyar la esposición de Fotoperiodismu Internacional del periodicu Diagonal. Como ya sabeis, los horarios de apertura del Centru son en principiu los Miercoles y los Xueves a partir de les 17:30.

Como broche final a esti invernal mes, el Vienres día 27, vamos tener la segunda nueche de Poesía y micru abiertu en la Semiente cola "Gran Timba Poética del Inviernu", na que vamos contar con más artistes que la otra vez, tanto los/les ya habituales de les timbes, como otros/otres del ámbitu llocal, y un micru abiertu, por si alguien más s'anima.

Equí vos esperamos!

LA SEMIENTE "Semando güei, Pa tener un mañana"

lunes, 2 de enero de 2012

Stop Deshaucios! Cronica y proximes actividaes.

   Bones xente, cambiemos d'añu, pero siguen los mesmos problemes y continuen les nueses ganes de lluchar a la escontra d'ellos.


La ultima actividá del añu fue'l partiu escontra los deshaucios de dos familes vecines de San Martín, en concretu de L'Entregu.
Ante ésto la asociación ACUDE Corbero organizó un torneu colos equipos rexonales del conceyu pa sacar unes perres que aunque nun van solucionar tolos sos problemes, van ayudayos nesta dificil situación.

Dende La Semiente desplegamos una pancarta y acudimos solidariamente con esta xente, ya que güei son ellos, pero mañana podemos ser cualquiera de nosotros, a los que el banco faiga pagar una deuda escandalosa que lu afuegue incluso dexandolu na calle, sin un techu pa dormir o cobixar a la so familia.
El torneu ganolu el CD San Martín, pero esta vegá nun fue lo más importante el resultau, y ye que la recaudación fue de 1000 euros, lo que demuestra la solidaridá existente, lo cual paeznos EXEMPLAR.

Además vamos collaborar cola xente del Corbero nuna gala benéfica, pa recaudar más fondos el Vienres 13 de Xineru nel Teatru de L'Entregu, a la que vos animamos a acudir, pa seguir ayudando, nesti casu con muchos artistes del conceyu, que desinteresamente tamién quieren collaborar.
Por último p'acabar el mes, nel Centru Social Autoxestionau La Semiente, fadremos un comedor popular mui especial.


En unos dies, colgamos los carteles cola nuesa programación de Xineru y el cartel de la Gala, mientres tanto podeis echar una güeyá a la foto na que sale la pancarta de La Semiente en la Voz de Asturies del otru día:

http://www.lavozdeasturias.es/asturias/cuencas/pelotazo-solidario_0_619138118.html#.Tv7aaI4rbRg.facebook

Ñacimos y entamemos en 2011, pero en 2012 nun vamos dexar de medrar.
CSA LA SEMIENTE

Contactu: Mail: lasemiente@hotmail.com
        Facebook La Semiente
        Direción: C/Eladio García Jove Nº6