miércoles, 27 de febrero de 2013

¡¡¡DEMOCRACIA O DEUCRACIA!! (L´ENCHUFISMU AL DESCUBIERTU)

Nestos momentos en que la corrupción “resplande con brillantez” en Asturies y nel estáu español, nun debemos d'escaecer que'l tratu de favor nel accesu al empléu públicu nun dexa de ser otra modalidá de corrupción en sí mesma, facilitando cola so esistencia otres formes delictives nel ámbitu de l'alministración pública, como por casu la relación esistente ente'l CASU MAREA y la provisión xeneralizada de puestos de funcionarios por aciu el sistema de Llibre Designación.

L“enchufismu” nel accesu al empléu públicu fraya los derechos fundamentales de les persones, corrompe a los cargos públicos y al funcionariáu que lo fai posible, degrada la democracia, xenera clientelismu políticu y/o sindical, grava económica y funcionalmente a les alministraciones yá que les persones escoyíes nun son les más eficientes y preparaes. Podemos dicir ensin medrana a equivocar que cuando l'enchufismu entra pela puerta nuna alministración o empresa pública , salen pela ventana la igualdá, la xusticia, la ética y la democracia.

Del empléu públicu y del omnipotente deu que determina en munches ocasiones quien van ser favorecíos y quien van ser perxudicaos, vamos falar esti xueves en La Semiente, de cómo operen y que mecanismos s'utilicen pa faer posible la DEUCRACIA, pero tamién vamos falar sobre lo que se debería de faer pa consiguir que los procesos selectivos d'empléu públicu garanticen al máximu posible'l PRINCIPIU D'IGUALDÁ.

Estí xueves 28 de febreru a les 20:00h nel centru Social La Semiente.

"El Cafetón" - Comunicau de prensa

Esti ye el comunicau que emitimos dende La Semiente, pa dar a conocer ciertes opiniones y cierta información a la que tenemos accesu, sobre la chapuza que pretende facer esti ayuntamientu con esti edificiu emblematicu del pueblu y cola modificación de les Normes Subsidiaries del Planteamientu.



Comunicau de Prensa - LA SEMIENTE



Antecedentes

L'edificiu conocíu popularmente como El Cafetón, forma parte del  Catálogu de Bienes   d'Interés de les Normes Subsidiaries de Planiamientu del Aytu. de Samartín del Rei Aurelio dende l'añu 1997 nel que fueron aprobaes. El Gráu de Protección que se-y reconoció foi'l d'ESTRUCTURAL , calteniéndose nesi nivel de protección hasta'l día de güei.

La reconocencia de protección Estructural  trai que, d'alcuerdu al Art. 293 de les mesmes Normes, “les obres a efectuar nos elementos sometíos a esti gráu de protección, sedrán les tendentes al so caltenimientu meyorando les sos condiciones de habitabilidá o usu, calteniendo la so configuración estructural, el so envolvente esterior y los sos elementos significativos. Permitense con calter xeneral y preferente, les obres autorizaes pal Gráu 1º, asina como les obres de Rehabilitación, con prohibición espresa de toles demás. Considérense escepcionales nos bienes catalogaos con esti gráu de protección, aquelles intervenciones que dientro d'una obra de les permitíes pa esti gráu, impliquen l'usu de materiales o técniques distintes de les orixinales que dean llugar a cambios de formes, colores o testures y qu'afecten a la envolvente esterior o a los elementos estructurales y significativos, escepcionalidá que dará llugar al yá citáu trámite d'informe favorable de la Conseyería d'Educación, Cultura, Deportes y Mocedá, con anterioridá a la concesión de la llicencia.”

Lo cierto ye que, dende 1997, el  Aytu. Samartín inoró en tou momentu la so  obligación llegal de velar pola integridá l’edificiu como parte del so Patrimoniu Cultural, asistiendo impasible al so deterioru, deriváu ésti, ente otres cuestiones, del incumplimientu per parte de los  propietarios del  deber de caltenimientu, pudiendo vese na actualidá la falta cristales o les ventanes abiertes, de manera que'l deterioru sufríu vese aceleráu por estes acciones, o por omisiones  a la d'efectuar arreglos necesarios pal so caltenimientu.


La obligación llegal del Aytu. de torgar  l'abandonu al que se sometió a esti bien protexíu queda recoyía meridianamente nel Art.29 de la Llei de Patrimoniu Cultural de Asturies qu'establez lo siguiente:  “En casu d'incumplimientu del deber de caltenimientu de los bienes integrantes del Patrimoniu Cultural d'Asturies, la Conseyería d'Educación y Cultura, cuando tenga constancia de dichu estremu, ordenará a los propietarios, posesores y titulares de derechos reales sobre dichos bienes la execución de les obres o la realización de les actuaciones que faigan falta pa caltenelos, cudialos y protexelos. Lo mesmo fadrán los Ayuntamientos, cuando tengan facultaes pa ello con arreglu a la llexislación urbanística y de réxime llocal y nel casu de bienes incluyíos nos catálogos urbanísticos de protección a que fai referencia'l Art.27 d'esta Llei.

Del Documentu presentáu a los Grupos Municipales conclúyese que, en realidá, los cambios del planiamientu que se planteen, incluyendo la descatalogación del edificiu, nun surde     puramente de la inciativa del Alcalde como se diz, sinón de la presentación al equipu de gobiernu d'un proyectu edificatoriu per parte d'instancies privaes. Asina lo entendemos cuando, en dichu documentu, lléense cuestiones como éstes; “Coles mesmes, n'ares d'una mayor versatilidá de les propuestes edificatories no qu'a volumetría se refier, propónse, pa esti casu concretu, flexibilidá na altura de la edificación, siempre teniendo en cuenta la edificabilidá máxima, que se redistribuirá nel solar según les necesidaes del proyectu, anque ello implique trespasar los estándares urbanísticos de les NNSS, si bien teniendo como referencia la llínea de máximu movimientu”,o bien, “Incluyese por tantu'l cambiu pa esta edificación en particular de los apartaos 3 y 6 del artículu 320 de les NNSS.”

Consideramos que ye precisu esclariar esta cuestión, por ello, dende'l gobiernu municipal deberíen de responder a la entruga concreta de si se-yos presentó, o non, un proyectu edificatorio concretu per parte de particulares y, si eso ye asina, porqué nun se-yos encamentó a presentar  la so propuesta nos términos que la lexislación contempla pa esos supuestos nos que ye la iniciativa particular la que pretende desarrollar l'urbanismu. Buscase con estes aclaraciones poner lluz y taquígrafos nuna actuación que lleva apareyada consigo, nin más nin menos, qu'un  cambiu del Planiamientu Urbanísticu Xeneral. 

Sobre l'estáu de ruina económica del edificiu’l Cafetón, La Semiente nun va entrar a contradicir les conclusiones de los técnicos municipales que, de xuru, van ser correctes. Agora bien, preguntamos si daquién, por casu los propietarios del edificiu, encamentaron la declaración de ruina, o bien foi'l mesmu Ayuntamientu quien la encamentó, anque hasta onde nós sabemos, paez ser que la ruina técnica, nesti casu nun la promovió naide, ya que nun esiste nengún espediente municipal de declaración de ruina sobre esti edificiu. Debemos de recordar que la tramitación de declaración de ruina d'un edificiu cualesquier trai l'apertura d'un espediente y una tramitación propia que nada tien  que ver  con cambios puntuales del planiamientu.


Lo mesmo podemos dicir sobre la descatalogación del edificiu, llámanos  poderosamente l'atención el fechu de qu'el Aytu. resalve que tamos, non ante'l cambiu del catálogu urbanísticu qu'acompaña a los Planes Xenerales d'Ordenación Urbana, sinón ante’l cambiu de la relación de bienes protexíos que figura nes Normes Subsidiaries de Planiamientu y que, a día de güei,  el Aytu. de Samartín sigue ensin adaptar a les  determinaciones que pa los Catálogos Urbanísticos s’establecen nel TROTU. Nesti sentíu, consideramos que ye d'aplicación  la Disposición Transitoria Sesta de la mesma Llei, nos  sos puntos 1 y 3 que recueyen lliteralmente, “Les previsiones establecíes nesti Testu Refundíu respectu de los Catálogos urbanísticos van aplicase tamién a los conceyos qu'a la entrada a valir de la Llei del Principáu d'Asturies 3/2002, de 19 d'abril, de Réxime del Suelu y Ordenación Urbanística, cunten con planiamientu xeneral o especial nel qu'apaezan rellacionaos de manera unitaria bienes, espacios o elementos d'interés públicu relevante que tengan de ser calteníos o recuperaos, o se remitan a un catálogu independiente, y, en cualesquier d'estos casos, les sos previsiones nun s'afayen o resulten contradictories coles determinaciones que pa los Catálogos Urbanísticos establez esti Testu. Nestos supuestos, los Conceyos tendrán d'empecipiar un procedimientu d'adaptación urxente al Testu Refundíu, aprobando o, nel so casu, modificando los correspondientes Catálogos con arreglu a los mesmos trámites que los establecíos pa la formación y aprobación del planiamientu xeneral o especial al que competen, incluyíos los actos preparatorios. Necesariamente, si antes nun se fixo, l'adaptación va tener que facese cuando se proceda a la revisión del planiamientu urbanísticu xeneral.”  El puntu 3 d'esta Disposición Transitoria, recueye taxativamente “Mientres nun se produza l'adaptación prevista nos apartaos anteriores, el planiamientu nun va poder alteriar la condición urbanística de los referíos bienes, espacios o elementos.”


Con éses paez evidente que, en tantu y cuantu nun se proceda a adaptar la rellación unitaria de los elementos protexíos nes NSP a les disposiciones que pa los Catálogos Urbanísticos determina'l TROTU, el Planiamientu nun podrá alteriar les condiciones urbanístiques d'esos bienes. Esto ye, nun se puede nesti momentu, modificar la condición d'elementu protexíu del edificiu del Cafetón, al traviés d'un cambiu puntual del Planiamientu, tal como se plantea dende l'equipu de gobiernu municipal.

Una vez evidenciada la responsabilidá de los socesivos equipos de gobiernu municipales socialistes na situación actual na que s'atopa l'edificiu, y suponiendo que se tramitara como tien que ser la declaración de ruina del edificiu, podríemos atopanos con dos supuestos: Per un llau, declaración de ruina calteniendo la catalogación del edificiu, lo que traería la obligación de rehabilitar l'edificiu, colo que supondría económicamente  pa la facienda llocal, ya que’l Aytu. veríase obligáu a pagar el 50 % del costu total de la rehabilitación que, teniendo en cuenta los cálculos municipales, seríen  d'un valor aproximáu de 172.000 €. y, por otru, la descatalogación del  Cafetón que supondría desfacese de toles torgues pal derribu l’edificiu.


 “La Semiente” ye consciente de que nun podemos castigar al vecindariu de Samartín a costear una rehabilitación que llega tarde, gracies al incumplimientu del deber de caltenimientu per  parte los propietarios y a la más absoluta desidia y al más execrable arrenunciu, per parte municipal, de defender y protexer el patrimoniu cultural de Samartín. Por tou ello, anunciamos yá que, nel so momentu, cuando s'actúe sol procedimientu llegal esistente, nun vamos plantegar sobre esta cuestión torga dalguna a la so descatalogación.


Sobre'l restu de la propuesta de Cambiu Puntual del Planiamientu anunciamos públicamente la nuesa oposición a lo que resulta a les  clares un pelotazu urbanísticu, pa lo que se diseñó un traxe de munchos colores qu'escuenden en realidá'l  vistu bonu a un proyectu singular qu'incumple tola normativa llegal esistente, altures, usos, etc., de manera tal qu’en vez d’esixir a quienes presenten el proyectu edificatoriu que se cinxan al planiamientu esistente, lo que faen, en realidá, ye modificar el planiamientu pa qu’ésta futura construcción tenga coartada llegal. Nesti sentíu “La Semiente” manifiesta la so voluntá de trabayar pa que n’esti conceyu toa la ciudadanía sea midida pol mesmu raseru, y que les acciones arbitraries, como esta que nos ocupa, nun atopen cabida en Samartín. 

viernes, 22 de febrero de 2013

Les movilizaciones populares y los facistes.

 El pasáu día 16 de febreru, a inicitaiva de la P.A.H. (Plataforma d'Afectaes pola Hipoteca) fíxeronse manifestaciones per tol Reino de España col asuntu del drechu a la vivienda y a la escontra de les polítiques hipotecaries y los deshaucios. Estes manifestaciones fueron secundaes y apoyaes por distintos colectivos sociales, sindicales, llaborales... y tuvieron distintos graos d'ésitu dependiendo les partes del estáu (Reino de España). Dende La Semiente quisimos tar ellí y apoyar la llucha, y como participantes pudimos comprobar un asuntu qu'aparte de dar noxu, ye un tanto precupante. Enantes d'empicipiar la manifestación, de la que la xente taba llegando, buscando sitiu, saludándose y eso, un grupu d'una ventena de persones púnxose a garrar sitiu, llegando a colocase incluso na cabeza de la mani. Algunes de nosotres namás velos ya detectemos que yeren militantes d’“estrema derecha”, neo-facistes, neo-nazis o como queriais llamalo. Xente que taba na organización nun se decataba de quién o qué yeren esta xente, y llegaron a tar unos minutos tan campantes; hasta que poco a poco la xente fue señalándolos y a la voz de ¡Nazis Fuera! fue identificándose-yos y les reaciones de refugar la so presencia allí foi espardiéndose ente la xente. Asina y too, aguantaron un bon cachu dientro de la manifestación y relativamente tardemos un cachín (más de los deseao) n'echalos. Al final hebo unos emburriones (algunu a un compañeru nuestru) y un poco d'amagu per parte de la policía, que los escoltó al otru llau la carretera. Por ello queríemos compartir unes pequeñes reflexones con vosotres.


 Nun sabemos si a estes altures tenemos que dicir que tipu de xente ye la que compón les files del neo-facismu, nin cual foi el papel de toa esta xente a lo llargo de la hestoria y la so complicidá con el capitalismu y cola derecha más socialmente aceptada o meyor camuflada. Tampoco creo que a estes altures de la película haya qu'esplicar cuála ye la so escala de valores, cualos los sos finxos políticos, les sos postures racistes, xenófobes, homófobes, antisemites, anitizquierdistes, machistes... non, o esperamos que non. Pero por desgracia, la sociedá ta poco formá y mui desinformá. Asina ye como nos quier el sistema, que siamos ayenes a la hestoria, que siamos ayenes a la política... pa tenenos confundíos, pa que nun sepamos identificar quién son, d'ónde vienen y qué pretenden los que nos gobiernen mientres nos gobiernen. Esa falta de conocimientu, esi pasotismu acumuláu durante años ye lo que fai que seyamos tan manipulables, tan pasivos y que políticamente nos dea igual ocho qu'ochenta, y qu'al final repitamos ensin nengún sentíu eso de “nun somos de izquierdas nin de derechas”, eso a la fin ye la pérdida de la conciencia de clase. Y eso compañeres, eso la “estrema derecha”, neo-facistes, neo-nazis o como queriais llamalo, sábelo. Sábenlo y tracen táctiques, estratexes... Ellos, nes sos webs, y nos sos “esloganes” tamién dicen eso de nin d'izquierdes nin de dereches, ellos van poniendo puquiñín a puquiñín el pelleyu la oveya, pa pasar desapercibíos ente los borregos, y a base de frases ambigües van entrando nel rebañu. Güeyu, nun entren na reciella pa ser unos más, non. Entren pa dir metiendo poco a poco y sutilmente el so mensaxe racista, senófobu, homófobu... y al fin y al cabu nazionalsocialista. Saben qu'una crisis como “esta” ye'l momentu ideal pa esparder el so mensaxe nazi.Y saben que nesti tipu de manifestaciones hai munchos tipos de xente, dende anticapitalistes de vieya forná (yá seya de una tendencia o d'otra) a reformistes, a simplemente persones afectaes sectorialmente, a xente solidario... pero tamién muncha xente nuevo que ta empecipiando a salir a la cai por primer vez, porque ta indigná. Yá saben qu'ente esa xente desclasá predomina la ignorancia y el desconocimientu de munches cuestiones polítiques, y tamién hai buenrrollismu abondu (onde tol mundu ye buenu y tol mundu cabe), y onde lo normal ye que nun los quiera echar la xente. Y por eso van cola tactica prepará, cola so pelleya d'oveya de dir de formalinos, de nun retrucar a provocaciones, de nun llevantar la zarpa a lo romano, de poner l'otru papu... Aguanten estoicamente porque quieren tar ellí pa semar la so semiente, y ya de pasu fain que xurdan enfrentamientos ente los cuatro seres comprensivos y compasivos pa colos amigos del Holocausto y la xente que nun vamos tolerar que los matones nazis de siempre se salgan cola suya.
 Lo del otru día nun foi la primer vez, nin por desgracia va ser la última. Por ello, ye que consideramos necesario que la xente garre conciencia de quién son estos individuos, de cuales son les sos pretensiones y de qué medios van a valise pa dir poco a poco faciendo un requexu a les sos postures dientro del descontentu “ desenfocáu” de la xente que se ta echando a la calle. Que nun pase como enantes de que Hittler ganara les eleciones o que nun nos pase como ta pasando anguaño en Grecia.Y por ello ye necesario que temos preparaos pa reacionar y apartar a estos colectivos d’ “estrema derecha” d'esti tipu de convocatories. Y por ello ye necesario que seyamos claros nes nuestres postures escontra cualisquier mensaxe racista, senofobu, homofobu, machista... dientro d'esti tipu de movilizaciones, venga de quien venga.

El mesmu día a les 19:00h dientro d'unes Xornaes d’Hestoria Militar, nel Centru Cultural Antiguu Institutu, cellebrábase una conferencia col títulu “Krasny-Bor, la última gran batalla de la historia militar española”. Durante la II Guerra Mundial hebo en Krasny-Bor un enfrentamientu nel que participó la 250ª División de Voluntarios Españoles de la Wehrmacht, más conocida como la División Azul. La conferencia taba al cargu de Carlos Caballero Jurado, un escritor conocíu pola so vinculación con ámbitos ultraderechistes, a la que fueron nazis. Como repulsa convocóse una concentración antifacista. De la que alguna xente foi llegando a dicha concentración, fueron salíos al pasu y escorríos violentamente por nazis, pero tamien poles FSE (fuercies de represión del estáu). Queremos mostrar el nuestru rechazu a los actos facistes y tamién al amparu institucional que se-yos dio por parte del ayuntamientu de Xixón, que cedió l'espaciu públicu del Antiguu Institutu Xovellanos. De l’actuación de les fuercies de seguridá pa qué falar, sabemos perfectamente lo que podemos esperar d'ellos. Recordar qu'entá nun apaecieron los responsables del ataque fechu va poco por unos cuarenta neonazis encapuchaos al Campu del Ciares, onde agredieron al vicepresidente del club deportivu. 



DEVOLVEMOS EL GUELPE?


jueves, 21 de febrero de 2013

DÍA INTERNACIONAL DE LA LLINGUA MATERNA

Güei 21 de febreru, ye'l día Intenacional de la Llingua Materna. N'asturies hai tres llingües, pero namás dos son orixinaries d'equí, l'asturianu y el gallego asturianu (na zona ente'l Navia y el Eo). Nun ye una casualidá que nenguna d'estes dos tea ensin reconocimientu llegal, colo qu'eso representa na discriminación de derechos humanos a los sos falantes y al pueblu asturianu en xeneral. Ye por ello, que siguimos pidiendo la OFICIALIDÁ del asturianu y del gallego asturiano como unica forma de respetar los derechos llingüisticos d'Asturies, y como forma de tirar p'alantre y nun dexar que poco a poco se pierda un patrimoniu esencial.
Pero esti añu queríemos comentar daqué más. Ca día vemos como munchos asturianofalentes de les cuenques van/vamos falando mas castellanizáo... y ca día vemos como los padres/madres falen-yos a los sus fios nun castellanu perfectu mientres ente ellos falen n'asturiano o n'amestáu. Que nós pasa... danos vergoña la llingua cola que nos falaben los nuestros güelos? salimos tontos/es por que nos dixeran les coses n'asturiano? entós? porque-yos falamos a los neños como si acabasen de llegar de marte?

Dexámosvos con esti encamientu y con esti cartel ya vieyu que diz poco y dizlo too.



miércoles, 20 de febrero de 2013

PINCHÉU SOLIDARIU. SOFITU

El día 22 de Febreru, Pinchéu Solidariu y cerveza Caleya nel Centru Social La Semiente de L'Entregu a les 19:30 hores
Van pinchar:
-EL CORRECTOR (SOULCIALISMU O MUERTE)
-ASGAYAH SOUND (toa triba de ritmos xamaikanos)
Les perres que se recalden van dirixise al pagu de los gastos xudiciales que nos reclama l'expresidente Areces.
Entama: SOFITU

sábado, 16 de febrero de 2013

Presentación del llibru "Cazados" .

 Esti llunes día 18 a les 19:00h vamos tener la presentación del llibru Cazados, de Germán Mayorga. esta actividá ta fecha en collavoración col Ateneo Republicano de Asturias,dientro de les sos actividáes que periodicamente y n'estremáos sitios vien faciendo col nome de "Los Lunes del Ateneo".


Existe otra niebla, que avanza más despacio y nos va cubriendo con tanta discreción que apenas la notamos…los episodios que nuestros mayores recordaron durante décadas en voz baja, se van perdiendo en los pliegues de la historia y hay quien está interesado en que así sea. Sin embargo, también existe quien se niega a rendirse ante el olvido. Germán…”

Germán Mayora García, a dicir d'Ernesto Burgos nel prólogu, aguanta a que se sotierre'l pasáu de mala manera. Nació en L.lena a pocu de terminar la Guerra, en 1941, y pudo escuchar de boca de los testigos presenciales los fechos que narra. Ye fundador de l'Asociación de la Memoria Histórica de L.lena y anguaño el so presidente. Nun llegó a terminar Derechu porque l'actividá d'acaldía nun dexaba tiempu a los estudios; foi Secretariu d'Organización d'aquel PSP de Don Enrique Tienru y Galván, Secretariu Xeneral Técnicu de la Conseyería de Presidencia con Francisco Priendes Quirós nel gabinete autonómicu de Rafael Fernández y agora ye pieza importante na dirección Rexonal del Atenéu Republicanu d'Asturies y soporte fundamental de la Fiesta del osu Reyicida. Entá tien tiempu pa mentar a los sos maestros, Don Ricardo Mallo y particularmente don Jesús Neira, del que supo estrayer un tanto d'habilidá pa les lletres.

“Cazados” ye'l so tercer llibru, que sigue a “De osos y de los osos. Cuentos y anécdotas” y “Gentes y cosas de Lena. Antigüedades y gentes de la Pola”. Ye una obra qu'acaba mal: muerren los mocinos, pero yera necesario cuntala, porque (Burgos, de nuevu) “…nunca tenemos d'escaecer a quien semaron coles sos vides una planta qu'entá crez amodo y qu'inevitablemente va acabar dando los frutos de la Llibertá y la Xusticia”.

Yo toi seguro de que Germán nun va ser Premiu Nobel de Lliteratura, nin aceptaría (¡faltaría más, él, básicu soporte del Atenéu Re-pu-bli-ca-nu!) el Príncipe d'Asturies, pero escribió una hestoria de xente común, nada d'aquella hestoria “na bella Verona…dos families, iguales una y otra n'abolengu…”, sinón un amor proletario, de los nuesos, víctima de quien quixeron escastar el pensamientu.

lunes, 11 de febrero de 2013

Actividaes Febreru



El Centru Social Autoxestionau “La Semiente”, asoleya les actividaes programaes pa esti mes antroxeru de Febreru.

 Dempués del éxitu de la proyección del documental “Los Colores del Viento”, el Martes día 12 podreis disfrutar del antroxu entreguín col vuesu disfraz fechu pa la ocasión.

 El llunes día 18 a les 19 30, nel centru social, tendrá llugar la presentación del llibru “Cazados, una aciaga historia. Popo y Josefina” col so autor Germán Mayora García.
Esta actividá cuenta cola participación del Ateneu Republicanu d'Asturies.

 Pa desfrutar d’una folixuca y ser solidarios cola xente represalia n’Asturies, na tarde-nueche del Vienres 23 a partir de les 19:30, Sofitu organiza na Semiente un pincheu solidariu, amenizau pol reggea y la musica negro de los dj’s “El Corrector” y “Asgayah Sound”.

 Ya finando el mes, el día 28 a partir de les 20:00 h, charrarase de empleu públicu de la mano de Manuel Benayas, espertu n’estos temes, nuna charra titulá “Empleu públicu: Democracia o deucracia”

 Además, nes mañanes de los Sabados 16 y 23 d’esti mes de don carnal, podrá participase n’un taller de defensa personal que s’impartirá de manera gratuita dende les 11 a la 13 (da tiempu a tomar el vermú)

 Por último recordar que ta abiertu el plazu p’apuntase pol módicu preciu de 20€ al autobús pal Alcuentru Asturies-Euskal Herria del 2 de Marzu en Gasteiz y que el centru social ta abiertu los Miercoles y Xueves a partir de les 17:30.

jueves, 7 de febrero de 2013

"Autoinculpaciones pol SAT y Concentración escontra la represión"

Como recordareis, fae unos meses tuvieron por Asturies los y les compañeres del Sindicatu Andaluz de Trabayaores (SAT). Nesta visita, traxeronnos unes fueyes pa autoinculpase nes espropiaciones realizaes en varios supermercaos andaluces feches polos compañeros, ya nel pasau 2012, pa repartilos ente la xente más necesitao.

Por ello y conociendo nes nuestres carnes lo que ye la represión contra los que lluchen, los siguientes colectivos:
La Corriente Sindical d’Izquierda, l’Asociación Cambalache, el Centru Social Sestaferia, l’Asociación escontra la esclusión Alambique, l’Asociación Cultural Picu Rabicu, l’Asociación L’Arcu la Vieya y L’Asociación Cultural La Semiente, convocamos un actu públicu, el prósimu sábadu 9 febreru, a les 12:30 h., delantre la Delegación de Gobiernu, n’Uviéu, pa faer efectiva la entrega d'estes autoinculpaciones recoyíes n'Asturies, en solidaridá coles aiciones d’espropiación realizaes pol Sindicatu Andaluz de Trabayadores (SAT) nos supermercaos de Mercadona.

SOLIDARIDÁ ENTE PUEBLOS!
LLUCHA ENTE CLASES!

martes, 5 de febrero de 2013

Los Colores del Viento. Proyeición 6 de Febreru a les 20

Mañana día 6 de Febreru a les 20 h de la tarde, entamamos coles actividaes d'esti segundu mes del añu, cola proyeición del documental "Los Colores del Viento", de Iván Menéndez, que taba programau pa finales del mes de Xineru pero que nos vimos obligaos a aplazar.


 Los Colores del Viento ye un proyectu audiovisual llevau a cabu por Iván Menéndez y Francine M. Houvenhagel y pretende ser una obra sobre’l comportamientu de les persones en soledá y aislamientu, y a su vez poner de manifiestu la gran capacidá que tienen los seres vivos pa sobrevivir nes condiciones más adverses.
Esti documental filmau nel Corralín (conceyu de Degaña), fue presentau el pasau mes de Payares nel 50º Festival Internacional de Cine de Xixón, recibiendo una gran acoyía polos asistentes.



Na grabación participaron varia xente conocio en La Semeinte, ente dellos el nuesu amigu, compañeru y hermanu Gonzaga García Antuña, que nos dexó fae un añu, polo que tamién sedrá un homenaxe a la so grandísima persona.

Equí vos dexamos la reseña sobre'l docu que sal güei "La Nueva España", ya el blogue nun nos dexa subir el cartelu.

http://www.lne.es/occidente/2013/02/05/francine-estrella-corralin/1363942.html