viernes, 20 de junio de 2014

Foguera San Xuan 2014 L'Entregu - La Fiesta'l Solsticiu

Llega'l branu, y con él una de les folixes más importantes del Centru Social Autoxestionau La Semiente.
Como ya vien pasando estos últimos 3 años, L'Entregu torna a tener una foguera popular, sedrá como nun pue ser d'otra manera la nueche del Llunes 23 de Xunu pal Martes 24. Como otros años el llugar onde va arder la pila va ser el prau que ta al llau del campu futbol “Nuevo Nalón”, y además esti añu somos los unicos nel conceyu que facemos foguera el día San Xuán.

Pela mañana procederase a enramar y engalanar les fontes del pueblu, tradición que animamos a recuperar tamién nel restu de fontes del conceyu (Sotrondio, Blimea, La Güeria, Lantero, y un llargu etc de pueblos,...)

Dende les 20 hores de la tarde del Llunes, apertura de la cantina nel prau, con Cerveza Caleya, Sidra L'allume y otros brebaxes.
Cuando ya llegue la nueche, a eso de les 22 30, una comitiva de cabezudos, gaiteros y otros personaxes van animar les calles de L'Entregu y llamar a la xente pa que venga pa la foguera.

Enantes de que prenda la mecha, va entamar la actuación de la batucada de les collacies “Matu na Cai”, que va prolongase fasta dempués de prender la foguera, que como nun pue ser d'otra manera va ser na medianueche. Esti añu, queremos quemar toles coses males d'esta crisis, y pa ello tenemos preparau un conxuru con munches sorpreses.

Dempués de la foguera, pa la xente que quiera seguir la folixa, además de la batucada va pinchase música bailonga, va haber queimada popular y tamién se fae un llamamientu a los amantes de la música a traer los sos instrumentos pa pasar un ratu agradable de ruiu y diversión.

Como munchos ya sabreis, La Semiente ye un centru social autoxestionau que nin quier ni recibe subvenciones ni públiques ni privaes, y onde se trabaya de manera altruista, la xente que quiera apurrir maera o muebles pue dexalo nel prau dende ya hasta el Llunes a la hora comer.

Recordar tamién que les perres que se saquen, van dir pa mercar material escolar, pa la “3ª Campaña de Recoyida de Llibros y Material Escolar” que tenemos puesta en marcha.

PUXA SAN XUAN! PUXA LES FOLIXES POPULARES!

lunes, 16 de junio de 2014

Documental: Morir en El Tarronal, de Luis Felipe Capellín.


El xueves 19 a les 20:00h nel Centru Social Autoxestionáu la Semiente va presentase el documental MORIR EN ELE TARRONAL de Luis Felipe Capellín. Capellín que va unos meses presentaba el so llibru “Gerrillero Quintana” vualve a L’Entregu pa presentar esta vez el so primer proyectu audiovisal en forma de documental.

Dende Finales de la década de 1940 y hasta la de 1970, esplotóse en Mieres una mina de mercuriu conocía comu "Mina El Tarronal". Trabayaron nella, a lo llargo de dalgo menos de treinta años, ochocientos mineros, de los que güei sobreviven solamente cinco. La mayoría d´ellos morrió ensin llegar a los ciencuenta años.

Na última etapa de les sos vides, amás, tuvo marcá poles secueles y el sofrimientu a causa del mineral. La sociedá asturiana, que tanto debemos a la minería del carbón, desconoz esta otra actividá que, a mediaos del sieglu pasáu, situó a Asturies comu ún de los llugares más importantes del mundu na estracción de mercuriu. Morir en El Tarronal intenta desplicar lo que significó trabayar y vivir naquella mina.

martes, 10 de junio de 2014

III Campaña de Recoyida de Llibros y Material Escolar

Ya casi que tenemos enriba’l fin del cursu escolar 2013-2014, y como nos años anteriores, “La Semiente” tratará d’ayudar a les families de la cuenca a enfrentase de la meyor manera posible al gastu qu’esto supón. Pa ello, tamos arrancando cola que será la III CAMPAÑA DE RECOYIDA DE LLIBROS Y MATERIAL ESCOLAR PAL CURSU 2014-2015

Recoyeremos los llibros y el material escolar que nos queráis dar dend'agora hasta setiembre pa repartir lo que vayamos acumulando a principios del cursu que vien. Como nes ocasiones anteriores, cada quien pué dexar lo que quiera y, en setiembre llevar lo que tope de lo que necesite, sin que seya necesariu por parte les families aportar pa poder dir a recoyer, nin posible por parte “La Semiente” asegurar que quien aporte vaya topar tolo que busque. Siguiendo cola mesma dinamica que los otros años, garramos lo que nos den y repartimos lo que tengamos a quien lo demande. Nun facemos reserves.
Pola experiencia de les anteriores campañes, sabemos que munches families, precisen más ayuda pa facese col material escolar que pa los propios llibros de testu, asina qu’esti añu vamos prestar especial atención a esto, y pa ello vamos dexar pelos chigres del conceyu unes huches nes que podáis ayudanos a recoyer alguna perruca (Ya sabeis que “La Semiente nin tien, nin acepta subvenciones públiques, y que siempre se faen les coses desinteresadamente y gracies al apoyu popular, polo que ya vos damos les gracies d’antemano) Toles perres que nos deis gastaranse en material escolar nes llibreríes y papeleríes del pequeñu comerciu de les cuenques. Tratando de que les perres del pueblu reviertan nos establecimientos del pueblu y evitando no posible les grandes superficies comerciales que precaricen el trabayu y lleven los beneficios pa fuera.
Lo que nos queráis dar, podéis dexalo en llocal de “La Semiente” que ta na calle Eladio Jove Nº6 de L’Entregu (Frente a l’academia Sto. Tomás, detrás del supermercáu “El Árbol”). Tamos abiertos los Llunes de 8 a 10 de la tardi, y los Miércoles y Xueves a partir de les 5.30. tamién podéis contactar con nos llamando al númberu 696209016
Aceptamos:

- Tolos llibros de testu que nos queráis dar d’esti añu y del pasáu, de tolos cursos y de toles escueles y colexos.
- Tou el material escolar que queráis traer. Llibros, llibretes, bolis, llapices, gomes, colores, estuches, carteres, mochiles, mandilones, chandals, etc.
- Donaciones en metálicu pa material escolar.

Como siempre, tratamos d’esparder la idea de que ser vecinos nun ye solamente vivir xuntos. Tamién ye ayudase y tratar de tirar unos per otros.

CONTRA LA CRISIS Y EL PARU, SOLIDARIDÁ POPULAR

lunes, 9 de junio de 2014

Presentación del llibru “Grupos autónomos, una crónica de la transacción democrática” a cargu del autor, Joni D.

Esti xueves día 12 a les 20:00h l’escritor Joni D. preséntanos nel centru Social Autoxestionáu La semiente, el primer llibru que trata d'una manera antropolóxica, hestórica y periodística, la trayectoria de los nuevos miembros de los grupos autónomos armaos que, a partir del MIL y hasta bien entráu'l gobiernu socialista,llucharon contra'l sistema social baxo’l cual vivieron. Una visión d'una parte de la hestoria, escaecida y callada, que, agora, encarase d'una manera valiente pero dafechu distinta a los llibros d'hestoria clásicos, con una estructura bien personal y nada habitual que da'l verdaderu protagonismu a la evolución social y política d'unos mozos en cuenta de faelo sobre los mesmos ellos mesmos.

Sinopsis del llibru:
En septiembre de 1973 yera desarticuláu'l MIL pero aquella razia nun acabó col movimientu autónomu armáu sinón que reforzólu. Les acciones pa intentar evitar la execución de Puig Antich, primero, y les que se llevaron a cabu pa espresar la rabia darréu de matalu, estendiéronse como una mancha aceite.
Un añu dempués de la desarticulación de la OLLA y los GARI morría'l dictador, en poco tiempu pasose de lluchar contra una dictadura fascista a faelo contra una democracia capitalista y monárquica.
Fueron los tiempos en que'l rei xuró los Principios del Movimientu Nacional y la Constitución, el PSOE abandonó'l marxismu, el PCE dexó tras el republicanismu y el capital encontó les bases del sistema social que terminó entartallando social y económicamente a la ciudadanía del estáu español.
Foi una llucha que duró pocu más de diez años hasta qu'en 1984 desmanteláronse los últimos grupos activos.
Esti llibru avéranos a los mozos que formaron parte d'aquellos grupos autónomos que se remontaron ante la gran mentira llamada "transición democrática" y tamién al contestu nel que vivieron: la contracultura, l'autonomía obrera, la clandestinidá y, poques gracies, la represión. La muerte del Jebo, al españar l'artefactu que manipoliaba en Toulouse o l'asesinatu d'Agustín Rueda na cárcel de Carabanchel formen parte d’esa hestoria callada.

Notes sobre l'autor:
Joni D. nació en 1968 y dende bien mozu fexo xirar la so vida alredor de la cultura. Ente 1982 y 1996 fexo de músicu, cantante, periodista, editor fonográficu y promotor, siempre d'una manera non profesional nel sentíu económicu de la palabra. En 1997 creó la empresa de promoción musical Hace Color, con dalgunos de que los sos grupos, como Cheb Balowski, La Kinky Beat, Joxe Ripiau o Fermin Muguruza, dio, polo menos, media vuelta al mundu.
A finales del añu 2010 publicó'l so primer llibru "Que pagui Pujol! Una crónica punk de la Barcelona de los 80", un llibru que pañaba les sos memories de mocedá y que recibió una gran respuesta per parte de crítica y públicu. Foi, amás, el primer llibru d'una nueva editorial cooperativista, La Ciutat Invisible. La resultancia de la collaboración ente la nueva editorial y el novel autor foi totalmente inesperáu: más de 3000 copies vendíes en dos años incluyendo una edición en castellanu ocho meses dempués de la primer distribución del orixinal.