1 de Mayu.

Esti miercoles ye 1 de Mayu, dia internacional de la clase trabayaora. Una xornada de llucha, de reafirmación. N'Asturies tenemos distintes cites pa reivindicar esta fecha propia y pa pa salir a la calle contra los atques del capital.

ACTOS DE LA CNT:
A les 12:00 hores en Mieres, MANIFESTACIÓN 1º MAYU. na plaza de la Llibertá va haber un mitin y darréu va salise en manifestación peles cais del pueblu.
A les 17:30 hores na casa sindical de Candás va haber mitin y les 18:30 hores la tradicional ufrienda floral nel "Prau del faru de Candás"

ACTOS DE CSI, CGT y SUATEA:
12:00 h Plaza L'Humedal, Xixón. MANIFESTACIÓN 1º MAYU. ¡ASTURIES EN PIE!.
PA RECUPERAR NA CAI LO QUE NOS ROBEN NOS DESPACHOS.

XI Folixa'l 1 de Mayu, Entraes ya disponibles.

Dempués del parón del añu pasau, la tradición del conciertu/folixa del 1 de Mayu que fae el Fusoa vuelve a perpetrase, y como na última edición, va ser na cuenca minera’l Nalón, col sofitu del Centru Social Autoxestionau La Semiente

El Sabadu 4 de Mayu, nel Cine Ideal de Ciañu (Llangreu), 5 grupos asturianos van deleitanos nesta folixa con ambiente festivu si, pero tamién reivindicativu.

“Dixebra”, con más de 25 años sobre les tables, “Skontra” col so potente punk-folk, “Zigua” mozu grupu xixonés de ska-punk, “IRA” dende Llangreu y Noreña faciendo HxC y el blimeín “Arma X” cola so rima comprometía, van dar caña sonora dende les 7 la tarde.

Les entraes van tener un preciu de 10€ n’anticipao y 12€ na taquilla, además d’una fila cero con bonos a 2€, pa que la xente que nun quiera/pueda dir al conciertu, pueda collaborar cola recaudación, que irá dirixía al pagu de multes por distintos conflictos obreros n’Asturies.

Estes entraes van poder adquirise en:

-Xixón: Trisquel, Tienda de comerciu xustu “Picu Rabicu”, llocales de la C.S.I., Sidrería Canteli (acutense plazes pal bus 5€) y C.S. Sestaferia.

- Uvieu: L’Esperteyu (plazes pal bus d’Uvieu 5€)

- Llaviana : Serinsa Llaviana Informática

- L’Entregu : C.S La Semiente y Chigre Ochobre.

- Ciañu: La Folixa

- Sama: Cervecería La Industria

- La Felguera: Matteria

- La Pola – Siero: El Judá y El Diañu.

II Aniversariu del Centru Social Autoxestionáu La Semiente

Cúmplense yá dos años desque abriera per primer vegada les sos puertes El Centru Social La Semiente, un espaciu abiertu, autoxestionáu y dinámicu. De xuru se trate del colectivu social con más actividá cultural de Les Cuenques, anque mediáticamente nun se vea espeyao. Dos años de gran actividá, totalmente autoxestionada, ensin nenguna subvención pel mediu. Siguimos demostrando como tantos otros colectivos, qu’al marxe de les ayudes económiques pue trabayase, puen faese munches coses y sobremanera faeles dende la más absoluta independencia que nos da'l nun ser una barriga agradecida de les instituciones.

Pa celebralo esti vienres 26 d'abril vamos realizar un pasacalles per L’Entregu a les 18.00h. Vamos Abrir les nuestres/vuestres puertes de la cai Eladio García Jove nº 6 pa empezar la folixa d’aniversariu a les 19:00h, y a partir de les 20:00h van dar empiezu les actuaciones col “escenariu abiertu” nel que se sabe van participar habituales d'estos eventos. A les 22.30h va ponese la mesa y pinchárase non solo comida, sinón tamién música, too regáo con un de los meyores caldos de la casa…. Cerveza Caleya.

Mientres estos años realicemos unes sesenta charres y presentaciones, visionaronse y analizáronse películes y documentales. Fiximos esposiciones de fotografía y cartelería, de pintura y d'humor gráfico. Realizáronse baries timbes poétiques dalguna d'elles internacional, hehehe, como la Ásturgalaica, y tamién llectures públiques na cai. Fiximos dos amagüestos, entamamos yá dos Fogueres de San Xuan de L'Entregu..., recuperemos los cabezudos peles cais de L'Entregu, fiximos pasacalles. Inauguremos un valtamientu... el del CEMPA, Entamemos escenarios abiertos, conciertos, sesiones de música con DJ, comíes populares, performances na cai... Entamemos dos grandes conciertos solidarios en Ciañu (el próximu va ser la fin de selmana que vien). Sacamos a la calle cinco números de la revista "Les Fueyes d'a Semiente", collaboremos con otres asociaciones y colectivos, como'l Ñeru Los Coríos na organización de 1ª y 2ª Xuntanza Malabar. Entamemos talleres de circu, texer llana, gomaespuma, defensa personal, construcción de regalos, calzáu en cueru... Compartieron esperiencia con nós persones y colectivos bien distintos y bien interesantes. Realicemos presentaciones lliteraries, de revistes, de proyectos d'información alternativa.... conocimos el testimoniu de lo que pasa n'otres partes del mundu en voz de los sos protagonistes... Conocimos distintes alternatives a unes o otres coses... Truximos a ponentes bien interesantes que nos falaron de temes diverses, interesantes y bien importantes pa la situación actual. Consolidemos un grupu de consumu responsable. Pañemos llibros y material escolar pa families ensin recursos, Escuchemos poesíes, cuentos, relatos... de la voz de los sos ceadores.... Vimos mil mundos en fotografíes.... Aprendimos a aprender y a desaprender... Cantemos, xugemos y baillemos con muncha xente... Escribimos xuntos... Metímonos na maxa del circu... Aprendimos a esfrutar del cine... Aprendimos a consumir...

Tamién compartimos un poco de lo que pasa social, cultural y políticamente en Asturies con xente y colectivos d'otros sitios que nos visitaron a lo llargo d'estos dos años, pero tamién espardimos esa “semiente” per otros llugares y espacios, como ye'l casu del primer “Topaketa/Alcuentru Asturies-Euskal Herria”, onde compartimos too eso con xente de Euskal Herria y mas llugares concretamente de la mano de la xente del Gaztexe de Gasteiz nel “Gasteizko Gaztetxea”.

Pero tamién tuvimos na cai, solidarizándonos colos colectivos y les persones que la precisaben, diendo a distintes convocatories de llucha, manifestaciones, concentraciones... ahí onde ye necesariu tar tolos díes. Pero tamién tuvimos convocándoles y siendo parte activa d'elles. Como la campaña ASTURIES EN PIE, coles sos “Marches contra'l paru, la corrupción, los retayos y la represión” xunto de los sindicatos de clase; CSI, CNT-XIXÓN, CGT, y SUATEA, y el COLECTIVU DE PARADES-PRECARIES D’ASTURIES mas otros munchos colectivos colos que solemos collaborar, entamamos apocayá n'Avilés y Xixón. Formamos parte activa de la Plataforma Asturiana Antifracking... axuntamos con otros colectivos p'aldericar y contribuyir a crear masa crítico y conciencia de clase. Contuberniamos, sí, claro que si, contuberniamos pa lluchar contra tolos ataques que sufrimos como pueblu, pa faer frente a tanta inxusticia y p'articular respuestes nuna sociedá fuertemente afrellada pero totalmente paralizada.

En definitiva: Rimos, lloremos, zarapiquemos, llevantemos, vamos zarapicar y vamos siguir llevantándonos. Lluchemos, tamos lluchando y vamos siguir lluchando; por que La Semiente d'otru mundu meyor, bilte, creza y de los sos frutos.

Dalgunes de les persones y colectivos que pasaron pequí... son:

Lliteratura y timberos poéticos: Aurora Boreal, Saúl Pushkin, Yeiko y Luis Gallego, Ana Vanessa Gutiérrez, Pablo Rodríguez Medina, Xulio Arbesu, Chechu Garcia, Ana Rosa Fernández, Miguel RiX, Laura Marcos, Pablo X. Suarez, Sergio Taboada, Miguel Allende, J.I. Pidal Montes, Pablo Antón Marín Estrada, David Fueyo, Rosario Hernández Catalán ...

Fotografía: Tuvimos una esposición de fotoperiodistes internacionales como: Boris Svarezman, Argeo Ameztoy, Eva Mañez, Olmo Calvo, Edu León, Joan Alvado, Edu Bayer, Diego Ibarra, Eduardo Martino, Amaya Zabalo, David Fernández, Ferrán Quevedo, Juan Carlos Rojas, Pedro Moreno y José Alfonso. También fotógrafos locales como Ana Cachafeiro, Porfirio Vicente Pérez, Aida Cadenas, Daniel Rodríguez, Hugo Menéndez, Delfín Valdés, Jacobo, Zapico, Bego Miguel...

Pintura y arte gráfico: Tuvimos los cuadros de Mariam González Fanjul y les viñetes de grandes artistes gráficos de prestíu internacional, amas de un exposición de arte y defensa de la tierra fecha polos colectivos méxicanos Lucharte y Resistencia Gráfica

Música y otres artes: K-Nalón, Elios, integrantes de la Caxa de Músicos de Xixón, Asgayah Sound, Corzobeyos, RIX, Canteli, Felpudos Peludos, Melu y Luis, Nel Sanchez, Andrea Llobu, El Ñeru los Coríos, Pim Pam Títeres, D.J. El Corrector ...

Colectivos: Realizaron actividaes conjuntamente con nós fora y dientro del centru colectivos como FUSOA, Sindicato Andaluz de Los Trabajadores, Vía Campesina, Sindicato Labrego Galego, Cambalache, Sestaferia, Sofitu, ADEPAVAN, Ixuxú Asturies-Euskal Herria Elkartea, Cooperativa Integral Asturiana, Soldepaz Pachakuti, Alambique, Colectivo de Refugiados Colombianos en Asturies, Ecoloxistes n'Aición, periodistas de Diagonal Asturies, tienda de comercio justo Picu rabicu, Ruta Escontra'l Racismu, los colectivos anarquistas Grisú y Orbayu, colectivo Ultravioleta, Grupu de Medioambiente del 15M de Xixón, COOP 57 Asturies, la Fundación Andréu Nin, CSI Mocedá, Darréu, C.N.T. ...

Seguro que nos queden dellos nomes de persones y colectivos, pero elles saben que yá formen parte de nós. Y ye qu’a lo llargo d'estos dos años, por La Semiente pasaron munches persones, munches propuestes, munchos suaños, munches voces. Gracies a toes elles por compartir con nós.

Día interancional de les Lluches Campesines

L'Entregu va acoyer los actos centrales de celebración del Día Internacional de les Lluches Campasiness (17 d'abril).

Diversos colectivos sociales asturianos (La Semiente, Soldepaz Pachakuti, 15M, Cambalache, Ecoloxistes n'Aición, Picu Rabicu, COSAL…) sumaron esfuerzos pa entamar distintes actividaes lúdiques y culturales en redol a los peligros de la sociedá de consumu y los sos posibles alternatives.

L'actu central de celebración va tener llugar el sábadu 20 d'abril nel parque d'El Cotu d'L'Entregu (en casu d'agua va treslladase a la plaza abastos) y va consistir nun mercáu de productos ecolóxicos, artesanales y locales, onde va haber degustaciones, xuegos, teatru na cai... Amás, esti mercáu va ser, en sí mesmu, una performance: va representar una especie d'aldega gala como metáfora de l'alternativa y resistencia que suponen los pequeños llabradores, productores ecoloxistes, grupos de consumu responsable, tiendes de comerciu xustu… frente a la sociedá de consumu (Roma) apoderada poles grandes multinacionales y superficies comerciales. Si vos arrimais, de xuru vais poder charrar con Astérix o Obélix, o inclusive tastiar la pócima máxica de Panorámix.

Pero la celebración va empezar un día antes, el 19 d'abril a les 18:00 hores, nel Centru Social de xubilaos d'L'Entregu, con charrar-coloquiu “Descolonizando el territoriu”, moderada por Javier Orozco (Coordinador del Programa Asturianu de DD.HH-Colombia) y na que van intervenir María José Llera (Relaciones Internacionales del SAT) y Eberto Díaz Montes (Presidente de FENSUAGRO-Colombia y Representante de Vía Campesina Internacional).

Yá'l sábadu 20 d'abril, día del Mercáu Galu, va abrise la xornada a les 11:00 hores nel mesmu Centru Social d'L'Entregu, cola mesa redonda “Ecoloxía de saberes: intercambiu de propuestes populares, llabradores, solidaries”, moderada por Beatriz Viado (periodista) y na que van intervenir miembros de distintos colectivos (SAT, Vía Campesina, La Semiente, 15M, SLG, etc.).

Soberanía alimentaria, agricultura ecolóxica y local, naturaleza, salú, dignidá llaboral… son conceutos que van llexar nel ambiente festivo d'esta conmemoración del Día Internacional de les Lluches Campesines que, per primer vegada, va tener un eslogan galu: “Si quies, non tolos caminos van pa Roma”.

Presupuestos Participativos nos Conceyos

La Participación Ciudadana ye un oxetivu clave p'avanzar na profundización democrática, y nesti sentíu, los Presupuestos Participativos constitúin práctiques concretes d'implicación ciudadana nos asuntos públicos al traviés de tomar decisiones sobre'l destín de los recursos públicos municipales.

En Asturies, polo xeneral, y na nuesa Cuenca del Nalón en particular, esta forma d'exercer la Democracia Participativa relluma pola so ausencia. Nunos conceyos xestionaos por gobiernos refractarios de por sí, a promover y facilitar la participación ciudadana nos asuntos municipales, y con unos grupos de la oposición a los que nun paez importa-yos en demasía estes cuestiones, resulta por demás importante esparder na sociedá, per mediu del alderique y l'información, qu'otra forma de xestionar los conceyos ye posible, que la participación ciudadana en tomar de decisiones ye garantía de tresparencia, eficiencia, y llimpieza na xestión pública.

Pa ello, esti Xueves, 18 d'Abril, a les 20 hores, na nuesa see sita na Cai Eladio Garcia Jove nº6 deL´Entregu, el C.S. La Semiente entama una Charra- Coloquiu sobre LOS PRESUPUESTOS PARTICIPATIVOS, al cargu de Nuria Rodriguez Lòpez, llicenciada en CC de la Educaciòn y esperta universitaria en Investigaciòn Acciòn Participativa pola Universidad Pablo Olavide de Sevilla.

Esta Semana, reguemos les semientes cerebrales!

Esta semana vien cargá d’actividaes nel centru social autoxestionau “La Semiente”

Esti mismu Miercoles vuelve el turnu del cine, cola proyección de la película “La Belle Verte” (Planeta Llibre) de Coline Serreau, onde cuentase la hestoria d’un pequeño y alloñáu planeta con una vida colectivizada, y la hestoria del viaxe de una de les sos habitantes a la Tierra, pero sobretodo, a la su sociedá.

 Per otra parte, el Xueves, vendrá cargau de actividá dende bien tempranu, en primer llugar, desde La Semiente, sofitase la concentración “Botín, danos un puestín” delantre del IES Virgen de Covadonga de L’Entregu a les 15.45h., de la qu’ayeri el colectivu saco un comunicau.

Más tarde, a las 17.30h dará comienzu un taller de reparación y puesta a punto de bicicletes, con una duración de 3 sesiones en les que podrás dexar la tu bicicleta apta pa disfrutar del buen tiempu con esti gran mediu de llocomoción.

Ya pa dar fín a esti xueves repletu d’acción, visitarán el centru social Victor Montes y Rosario Hernández Catalán, pa presentanos la Cooperativa Integral Asturiana, en una charra titulá, "Cooperativa Integral. Revolución Integral. Potencialidades n’Asturies"

Ambos ponentes van falanos del modelu económicu, social y políticu que supon el modelu de la cooperativa integral. Tan faciendose cooperatives de esta xera en tou el país, pero l’exe surde en Cataluña como una forma de resistencia y de xeneración d’una alternativa al sistema estatal capitalista. Pero tamién de Revolución Integral, del derechu de rebelión como pilares poíticos de les Cooperatives Integrales, de la moneda social y de la organización n’Asturies d’esti proyectu.

Recordar que tanto’l Miercoles, como’l Xueves el Centru Social tará abierto al publicu en xeneral, que pue disfrutar d’una biblioteca llibre y gratuita.

Llobos con piel de corderu

Esti Xueves 11 d’abril, va cellebrase nel pueblu de L’Entregu un eventu organizáu pola Asociación de Jovenes Empresarios (cola su marca fundacional) y la Fundación Botín, nomau “Emplea-t 4x4” nel IES Virgen de Covadonga, y nel que participen los ayuntamientos de SMRA y Llangreu.

Dende La Semiente queremos refugar esti actu hipócrita de la patronal y la banca. Unos y otros, vienen machacándonos día a día sin dudalo ni un momentu, esplotándonos, encadenándonos a hipóteques que nun podemos pagar, con reformes llaborales complices que afueguen a tola clas obrera, echándonos de les nueses cases y pensando únicamente nos sos beneficios personales.
Pero agora, quieren llavar el focicu con un eventu que venden como “la panacea” ante los sangrantes números de paru nes cuenques, n'un intentu d'ufiertar a la sociedá una imaxe humana de los mesmos que tan dexando na misería a pueblos enteros como los nuestros y quieren faer llegar a la xente la perceición de que los grandes empresarios tienen sensibilidá social.

En La Semiente nun tragamos pa con esta mentira, por eso axuntámonos a la convocatoria de Conceyu Abiertu y animamos a la xente a que acuda a la concentración convocada pa esti Xueves 11 a les 15.45h delantre l’institutu entreguín, pa dexayos claro que nun mos la van "meter doblá" tan facilmente.

NON MÁS HIPOCRESIA DE LA PATRONAL CACIQUIL!

Actividaes del mes d'Abril

Cuartu mes del añu, y nesti casu, un mes especial porque’l Centru Social La Semiente cumple dos años apostando poles actividaes sociales y culturales y  con una fuerte apuesta pola autoxestión y la crítica social.

Na programación d’esti mes vuelve a tar presente’l cine, con proyeiciones a la hora y día habitual: Miércoles 3, 10 y 24 a les 20h de la tarde. Como estrenu cinematográficu del primer Miércoles del mes, podrase disfrutar del documental “Tábanos/Ziztadak” presentáu nel Festival de Derechos Humanos de Donostia y que trata sobre la desobediencia civil n’Euskal Herria.

Tamién cola llegada del bon tiempu, los y les ciclistes tendrán un sitiu nel Centru Social cola celebración d’un taller de reparación y puesta a puntu de bicicletes qu'entamará’l día 11 d’Abril (Xueves) a les 17:30h. Esti taller será impartíu por miembros del propiu centru y de baldre.

Los Xueves davezu ye’l día escoyíu pa les charres informatives qu’entamarán el día 11 a les 20h cola presentación de la “Cooperativa Integral Asturiana”, por dos de los sos miembros, Victor Montes y Rosario Hernández Catalán. Van falanos del modelu económicu, social y políticu que supón una cooperativa integral y del so orixen nel Estáu cola experiencia en Cataluña y su extensión n’Asturies.

La siguiente selmana, concretamente’l día 18 a la mesma hora, en La Semiente va falase de “Presupuestos Participativos” nuna charra que pinta per interesante.

Per otru lláu, alredor del Día Internacional de les Lluches Campesines, van organizase en L’Entregu varios actos entamando’l Vienres 19 a les 18h con una xornada de sensibilización a cargu de “Vía Campesina Internacional” qu’organiza l’asociación collacia “Soldepaz-Pachakuti”nel Centru Social de Mayores del pueblu.
L’actu central d’esta selmana reivindicativa tamién celébrase en L’Entregu teniendo como escenariu’l Parque del Coto onde habrá una mercacción (mercáu-activu) titulada: “La Galia contra Roma” y qu’entamará a les 16h.

Pa finar el mes y aprovechando daquella proyeición audiovisual que sirvió de pistoletazu de salida a La Semiente, vamos celebrar con toes y toos el nuesu segundu cumpleaños con una fiesta que sedrá’l día 26 d’Abril y de la que tovía tamos ultimando los detalles. Tai sollertes.

Como siempre, nun escaecer que’l Centru Social Autoxestináu “La Semiente” ta abiertu los Miércoles y Xueves a partir de les 17:30h poniendo a disposición una biblioteca llibre y de baldre