www.lasemiente.blogspot.com
De secute, informámosvos de la cellebración d'una "Semana atea" na que veremos proyeiciones, charres, esposiciones... del 4 al 11 d'abril, too ello nel nuesu llocal de la Cai Eladio Jove. Esta "Semana Atea" abriráse con una esposición que va durar los siete díes de programación atea; del 4 al 11 d'abril podremos ver "Viñetes atees: l'ateísmu nel arte gráficu", del Coleutivu Grisú. D'otra, también esti miércoles 4 a les 20 hores podremos disfrutar nel llocal de la Proyeición "Jesús Camp: soldaos de dios" pesllando la selmana temática col documental "Rocío" de Fernando Ruiz Vergara el miércoles 11 a las 20 hores; nesta obra de cine documental recuéyese'l testimoniu de vecinos d'Almonte; a traviés d'ellos podemos esclariar un poco más si cabe quiénes fueron los responsables de la represión desatada a partir de 1936 na zona na que se cellebra la popular "romería" onubense que-y da nome a la cinta.
El xueves 12 d'abril tamién a les 20 hores tendremos la charra "Estratexa Universidá 2015", na que los "Asamblearios de la Universidá d'Uviéu" van contanos la so visión de la deriva llegal, económica, política... universitaria que les alministraciones educatives nos tienen preparada pa que culmine a la fin del prósimu trieniu; too ello ta xustificao cola ratificación y robla del Tratáu de Bolonia, enmarcao na "Carta Magna" ratificada pol estáu español en Bolonia nel añu '88.
El sábadu 14, pa seguir el mes con un poquiñín d'ambiente nel nuesu Centru Social, a las 19:30 el grupu de música "Rix" presentarános el so nuevu discu "Utopía". Esti grupu fai música enmarcada nel rock-fusión con distintos estilos y con acompañamientu de lletres crítiques e incontestables; ésta ye la principal mateiral prima d'esta banda encabezada pol escritor Miguel Rix, que basa cada discu nuna novela de so.
El 18 y 19 d'abril, el "chamán" Ánxel Rubín darános un par de conferencies a les 20 hores; el primer día falaranos sobre "Curaciones enerxétiques" pasando a falanos de "Sanaciones espirituales" el xueves, amosándonos una manera d'entender los procesos curativos perdiferente a la que tamos avezaos nel mundu de la melecina convencional.
Pa finar el mes, la abogada Alba García Torres va ufrinos la so particular visión de la última reforma llaboral el xueves 26 a les 20 hores.
Dende'l Centru Social La Semiente, queremos seguir invitando a tolxs vecinxs de L'Entregu y del valle a toes aquelles actividades que venimos cellebrando, asina como a facer tou tipu de propuestes, ufiertes...
Informar tamién que tamos preparando la II Xuntanza Malabar y que l'exe temáticu del ciclu de cine mensual que se fae los miércoles a les 20 hores ye'l CIRCU nesti mes d'abril.
PD. Axuntámosvos cartel de la programación del mes d'abril. El llocal ta abiertu los miércoles y xueves dende les 17:30 hores.
No hay comentarios:
Publicar un comentario