Solidaridá con Edu León. Fotoperiodista deteníu.

Dende La Semiente solidarizamonos con Edu León, fotoperiodista deteniu arbitrariamente. Como non, solidarizamonos con toles persones y colectivos que sufren la persecución y criminalización pol meru fechu de lluchar escontra les inxusticies sociales o simplemente por denunciales.

Esvillao de Diagonal:

Edu León con otros fotografos enantes de la detención.

El fotógrafu Edu Leon pasa la nueche en comisaría dempués de ser deteníu por axentes de la Policía Nacional mientres s'atopaba documentando el desahuciu d'una familia en Leganés. A pesar de los intentos del abogáu, Marc Sanz, por que se  punxéra a disposición xudicial al fotoperiodista'l mesmu día de la detención, daqué que'l xuez aceptara, esto nun foi posible por cuenta de que'l atestáu ellaboráu pola Policía nun fuera completáu. En concretu, l'atestáu escarecía de la declaración del “policía supuestamente afrelláu por Edu”, esplica'l so abogáu, que confirmó que se-y acusa de “atentáu contra axente de l'autoridá”, una acusación que nun se sostien porque “nun hubo nin agresión nin intentu d'agresión”.

Albert Astudillo, miembru de Fotogracción que s'atopaba nesi momentu al pie de Edu, esplicó a esti mediu cómo dellos axentes de la Policía Nacional ensin identificación nin númberu de placa, dempués de retener contra la paré a un grupu de persones, mayoritariamente fotógrafos, pidiéron-yos la identificación. “Edu apurrió la documentación y siguió trabayando. Cuando volvieron colos carnés, un policía señaló a Edu y dixo: ‘A ési’”. Dellos testigos confirmaron a esti periódicu la mesma versión y que en nengún momentu'l fotógrafu afrelló nin amenació a nengún axente.

Leon sufrió enantes l'acosu policial nel desempeñu del so trabayu. Foi deteníu y xulgáu en cuatro causes por acusaciones feches pola policía mientres documentaba cola so cámara fotográfica los controles d'identidá racistes que tolos díes tienen llugar en Madrid, y llegóse-y a sustraer material fotográficu.

El xueves pela mañana, Edu Leon, miembru del colectivu editor d'esti periódicu, va pasar a disposición xudicial nos Xulgaos de Leganés, y el maxistráu va decidir si siguir coles dilixencies por atentáu contra l'autoridá o pasar esti casu a faltes, lo que supondría o un xuiciu por faltes o, nel meyor de los casos, l'arquivu de la causa. Los miembros del colectivu Diagonal van allegar el xueves a los dolce de la mañana a la plaza de los Xulgaos de Leganés pa sofitar al compañeru y conviden a sumase solidariamente a esti actu.