Mumia Llibertá!

El día 9 d'avientu de 2011 cumpliéronse 30 años desque Mumia Abu Jamal foi deteníu, encarceláu y finalmente condergáu a muerte pol supuestu asesinatu d'un policía de Philadelphia/USA.

El xuiciu escontra de Mumia foi una farsa y amosó un grau de racismu esmolecedor. El sistema políticu y xudicial utilizó tolos métodos ilexítimos y hasta illegales pa condergar y matar a Mumia Abu-Jamal; pa esaniciar al ex Black Panther arreyáu na dómina de MalcolmX y Martin Luther King na llucha pola lliberación de la comunidá afro-americana, pa faer sumir al periodista críticu qu'acababa de ser llamáu “la voz de los ensin voz“.

Mentanto, dende la década de los 90 desenvolvióse, dende EEXX, Francia y Alemaña, una campaña cada vez más global, que sigue estendiéndose a cada vez más países. Güei día hai grupos de sofitu en tolos continentes. En más d'una ocasión la presión pública ayudó a evitar la execución inminente, como en 1995 y en 1999 cuando'l día de la execución taba yá determináu.

L'ampliu movimientu solidariu demuestra que Mumia Abu-Jamal nun ye un presu políticu cualesquier. Al traviés de la so llucha continua, de les sos columnes, al traviés de los sos llibros y los documentales fechos, Mumia convirtióse nun símbolu non solo de los y les negres americanes, sinón tamién de la llucha anticapitalista, y, de xacíu nun símbolu de la llucha escontra la pena de muerte.

Dientro la campaña que se ta faciendo a nivel Internacional col casu de Mumia, La Semiente va proyectar el documental "In prison my whole life (En prisión tola mio vida) que fala de la so hestoria. Va ser el miercoles 14 a les 20:00s nel mesmu centru social.

 POR UN XUICIU NUEVU Y IMPARCIAL PA MUMIA ABU-JAMAL

 ESCONTRA EL RACISMU MUNDIAL

 ESCONTRA LA PENA DE MUERTE Y LES CADENES PERPETUES

 LLIBERTÁ PA MUMIA

Premios, homenaxes y publicaciones de Mumia Abu-Jamal:

 Ciudadanu honoríficu en más de 20 ciudaes de tol mundu, ente otros Paris (dempués de Marie Curie y Pablo Picasso); y Villejuif (Francia) (dempués de Nelson Mandela); Montreal, Palermo y Copenhaguen.

 “Rue Mumia Abu-Jamal” nel barriu Saint-Denis de Paris (29 d'abril de 2006)

 Miembru oficial del PEN internacional dende 2008

 Miembru honoríficu de l'alemana Asociación de los Escorríos del Réxime Nazi – Lliga de los Antifascistes (VVN-BdA).

 Dellos premios de lliteratura, ente otros el premiu “Erich Mühsam”.

 CORREOS del estáu francés (El Poste) editó n'abril 2011 un sellu cola imáXen de Mumia.

 Mumia Abu-Jamal ye autor de dellos llibros (inglés, alemán) y sigue publicando ensayos sobre temes actuales en periódicos y radios.

 Llibros en castellán: “Brota la vida“, Editorial Txalaparta, 1999, y “DeSde la galería de la muerte“, Editorial Txalaparta, 2001.