martes, 2 de junio de 2015

IV CAMPAÑA DE RECOYIDA DE LLIBROS Y MATERIAL ESCOLAR




Ya casi que tenemos enriba’l fin del cursu escolar 2014-2015, y como nos años anteriores, “La Semiente” tratará d’ayudar a les families de la cuenca a enfrentase de la meyor manera posible al gastu qu’esto supón. Pa ello, tamos arrancando cola que será la IV CAMPAÑA DE RECOYIDA  DE LLIBROS Y MATERIAL ESCOLAR PAL CURSU 2015-2016
Recoyeremos los llibros y el material escolar que nos queráis dar dend’agora hasta setiembre pa repartir lo que vayamos acumulando a principios del cursu que vien. Como nes ocasiones anteriores, cada quien pué dexar lo que quiera y, en setiembre llevar lo que tope de lo que necesite, sin que seya necesariu por parte les families aportar pa poder dir a recoyer, nin posible por parte “La Semiente” asegurar que quien aporte vaya topar tolo que busque. Siguiendo cola mesma dinamica que los otros años, garramos lo que nos den y repartimos lo que tengamos a quien lo demande. Nun facemos reserves.
Pola experiencia de les anteriores campañes, sabemos que munches families, precisen más ayuda pa facese col material escolar que pa los propios llibros de testu, asina qu’esti añu vamos prestar especial atención a esto, y pa ello vamos dexar pelos chigres del conceyu unes huches nes que podáis ayudanos a recoyer alguna perruca (Ya sabeis que “La Semiente nin tien, nin acepta subvenciones públiques, y que siempre se faen les coses desinteresadamente y gracies al apoyu popular, polo que ya vos damos les gracies d’antemano) Toles perres que nos deis gastaranse en material escolar nes llibreríes y papeleríes del pequeñu comerciu de les cuenques. Tratando de que les perres del pueblu reviertan nos establecimientos del pueblu y evitando no posible les grandes superficies comerciales que precaricen el trabayu y lleven los beneficios pa fuera.
Lo que nos queráis dar, podéis dexalo nel local nuevu de “La Semiente” en La calle Nueva nº 1 de L’Entregu (cerca del La semiente 2vieya2, xusto nentes del parcamientu del Pozu Entrego) Tamos abiertos los Llunes de 8 a 10 de la tardi, y los Miércoles y Xueves a partir de les 5.30. tamién podéis contactar con nos llamando al númberu 696209016     
Aceptamos:
Tolos llibros de testu que nos queráis dar d’esti añu y del pasáu, de tolos cursos y de toles escueles y colexos.
Tou el material escolar que queráis traer. Llibros, llibretes, bolis, llapices, gomes, colores, estuches, carteres, mochiles, mandilones, chandals, etc.
Donaciones en metálicu pa material escolar.
 Como siempre, tratamos d’esparder la idea de que’l vecindariu d’un pueblu, nun ye solo xente que vive nel mismu grupu de cases. Tamién ye xente que fai por apoyase mutuamente.
                         CONTRA LA CRISIS Y EL PARU, SOLIDARIDÁ POPULAR

No hay comentarios:

Publicar un comentario en la entrada