A VUELTES COL CIELU ABIERTU

A VUELTES COL CIELU ABIERTU

El pasáu 2 d’Agostu de 2013, “La Semiente” remitió a la Dirección Xeneral de Minería y Enerxía escritos d’alegaciones a los estudios d’impactu ambiental de los proyectos d’esplotación a cielu abiertu conocíos como “Pontones” “Esperanza” “Los Artos” y “San Juan”, unu de los cuales (Artos), tendrá un impactu mui grande en Samartín. Unos díes más tarde (7 d’Agostu), cuntábamosvos nesti mismu blog lo que habíemos fecho y la nuestra posición sobre esti asuntu. Por cuntalo de manera resumía, les alegaciones presentaes señalaben faltes de documentación nos proyectos, dellos incumplimientos de la llexislación, indefinición de l’activida, falta d’analis d’alternatives, d’impactu sobre la población, la calidá del aire y les agües, la xeneración de residuos y la so caracterización, el mediu natural (fauna y flora) y el paisaxe. Tamién se planteaben insuficiencies nel Plan de Vixilancia Ambiental y la falta d’estudios sobre l’aceptación social de los proyectos.

Güei volvemos sobre esti tema pa cuntavos qu’estos díes recibiemos rempuesta cola resolución de la Conseyería d’Economía y Empléu de fecha 21/2/2014 desestimando toles alegaciones presentaes, colo que se pon fin a la vía alministrativa. Comunícasenos que contra esta resolución cabe interponer recursu contenciosu-alministrativu ante la Sala de lo contenciosu- alministrativu del Tribunal Superior de Xusticia d’Asturies, pa lo cual tenemos que dir asistíos d’abogáu y procurador. Como nun tenemos perres pa los gastos que supón, nun podemos presentar el recursu, colo que nos vemos indefensos ante la resolución de la conseyería.

A nos, sigue paeciéndonos una llocura que l’alministración defienda un proyectu d’esplotación minera a cielu abiertu col coste ambiental qu’esto supón, y se llene la boca colos puestos de trabayu que van criar (bien pocos) mientres se destruye empléu a espuertes na minería tradicional d’interior. Por eso, paeznos que nun ta de más volver a poner equí lo que ya dicíemos aquel 7 d’Agostu de 2013.

“Aparte de señalar nos escritos  d'alegaciones les carencies ya irregularidaes de los estudios d'impactu ambiental presentaos, "La Semiente", siempre preocupá pola degradación salvaxe del mediu ambiente, posicionase claramente en contra de l'apertura d'esplotaciones mineres a cielu abiertu, pues aunque somos conscientes de la necesidá de criar puestos de trabayu nos conceyos afectaos por estos proyectos, nun podemos aceptar qu'esos emplegos nos cuesten l'inasumible preciu d'una degradación ambiental que non solo vamos sufrir nos, sinón que tamién la van sufrir les xeneraciones venideres. Polo tanto, afitámonos nuna postura que podríemos resumir na frase

  ¡puestos de trabayu si, pero a cualquier preciu non!”

DEFENDAMOS LA MINERÍA D'INTERIOR.