Dende va dos años, un bon númberu d'organizaciones sindicales y coleutivos sociales decidimos xunir fuerces en ¡Asturies en Pie!.
Demientres 2013 desenvolcamos numberoses movilizaciones n’estremaos puntos de la xeografía asturiana. Los rescates millonarios a la banca, el fraude fiscal, la economía somorguiada, la corrupción, l'acoso y baltamientu de la Sanidá, la Educación y los Servicios Sociales públicos, el xorrecimientu la probeza, el paru esbocao, l'ataque fulminante a los derechos llaborales de les y los trabayadores, la represión a la escontra cualquier triba protesta social o'l derechu de les muyeres a decidir sobre la so maternidá, fueron dalgunes de les cuestiones que les movilizaciones de ¡Asturies en Pie! llevaron a les cais.
En ¡Asturies en Pie! nun pretendemos ser un nuevu foru d'alderique, sinón un preséu de llucha y movilización. Y, magar qu'intentamos xunir estremaes lluches seutoriales, nun pretendemos aglutinar la totalidá la protesta social, porque somos conscientes de que naide tien la capacidá de faelo. Solamente pretendemos ser una ferramienta más, de les munches qu'esisten n’Asturies, que sía útil p'algamar les reivindicaciones obreres y populares poles que tamos engarrando.
Sicasí, en ¡Asturies en Pie! compartimos delles idees básiques. Somos clas obrera y lluchamos pola clas obrera. Somos d'izquierda, buscamos el fin del capitalismu y creemos que tienen de ser los y les trabayadores quien lideren esta llucha popular y social.
Nun hai dulda de que l’avance’l sistema capitalista ye un fechu cada vegada más real. Nun ye ciertu que'l capitalismu tea en crisis. La so fuerza xorrez de cutio y, preba d'ello, ye la constante perda de derechos que la clas trabayadora tamos sufriendo, non yá nel Estáu español, sinón en tol planeta.
Fame, miseria, guerres creaes artificiosamente..., too val con tal d'apoderase de los recursos mundiales y asitiar nel poder a Gobiernos que nun son otra cosa que cómplices al serviciu los grandes poderes y potencies del mundu. Gracies a ello, millones de persones muerren, víctimes de la fame, la sede, los conflictos bélicos, el trabayu esclavu, el totalitarismu y les inhumanes condiciones de vida impuestes pol capitalismu.
Equí, n’Asturies y nel Estáu español, la realidá entama a dar vértigu. Un trabayu dignu, una vivienda, un hospital, una escuela, la universidá, inclusive les melecines o la eletricidá, empiecen a tornase en luxos demasiáu caros que los y les trabayadores yá nun podemos permitinos. Hasta los mesmos alimentos dexaron de tar garantizaos pa toos y toes.
La gran mayoría de la clas obrera asturiana yá nun trabaya en grandes empreses o sectores productivos. La gran mayoría de la clas obrera asturiana nin siquier trabaya o faelo en trabayos precarios con sueldos que yá nun dan pa comer. La gran mayoría de la clas obrera asturiana ta empuesta a la miseria. Esa ye la realidá.
Per otru llau, el deterioru los servicios públicos, sía sanidá, tresporte o educación, que casi siempres obedez a una estratexa empobinada a favorecer les privatizaciones, supón un ataque más a les condiciones de vida de la clas trabayadora.
Mentantu, unos pocos amasen fortunes y poder a cuenta la miseria de munchos, y el dineru que precisamos pa sobrevivir, súmese peles alcantarielles de la corrupción y les estafes de la banca y la patronal. Y nun se trata solamente de qu'unos cuantos políticos, banqueros y empresarios tean repartiéndose beneficios ilícitos debidamente ensobrados. Ye'l mesmu sistema capitalista lo que ta corrompíu hasta'l migollu y namás finando col capitalismu vamos poder atopar igües a los problemes que tenemos.
Pero, anguaño, pidir coses tan básiques como un trabayu dignu, un hospital onde curase, una casa onde vivir o una escuela onde estudiar, págase con multes, golpes, xuicios y cárcel. La llamada Llei Mordaza aumenta esponencialmente la represión y derechos como'l de xunta y manifestación entamen a ser parte’l pasáu. Les sées de les organizaciones polítiques, sindicales y sociales empiecen a ser asaltaes y la represión a la escontra les muyeres llega a impone-yos la obligación de ser mas a la escontra la so voluntá. Asina de criminal ye'l sistema capitalista y asina de criminales son los gobiernos que lu faen posible.
Nesti sen, dende ¡Asturies en Pie! vamos sofitar a cualisquier persona represaliada de resultes de la so participación nes estremaes lluches sociales que se tán dándose n’Asturies o en cualesquier fastera’l mundu. ¡Nin una persona sola énte la represión!, ¡nin una persona sola na llucha pola xusticia social!.
¡Asturies en Pie! pretende ser una ferramienta útil nesta engarradiella. Nun ye una organización nin un movimientu nin una plataforma. ¡Asturies en Pie! ye una conseña de llucha y resistencia obrera y social: lo que ta en xuegu nun son sólamente los nuesos derechos llaborales y sociales, sinón la nuesa mesma supervivencia.
Poner Asturies en Pie significa faer frente a esta realidá y atopar la nuesa mesma forma d'organizanos, la nuesa mesma forma de movilizanos y la nuesa mesma forma de construyir el futuru.
¡NIN UNA PERSONA SOLA ÉNTE LA REPRESIÓN!. ¡NIN UNA PERSONA SOLA NA LLUCHA POLA XUSTICIA SOCIAL!.
No hay comentarios:
Publicar un comentario