Dende La Semiente, creemos na participación popular, en marcar nos el nuesu futuru y como primera piedra, presentamos nel nuesu ayuntamientu unes suxerencies pa la redacción del Plan Xeneral d' Ordenación Urbana.
A l'atención del Sr. Alcalde del Conceyu de Samartín del Rei
Aurelio.
ASUNTU: Suxerencies al Documentu de Prioridaes del PGOU
Nel
desenvolvimientu d'ellaboración del Plan Xeneral d'Ordenación Urbana de
Samartín del Rei Aurelio, presentóse apocayá'l Documentu de Prioridaes de dichu
Plan, atopándose nesti momentu nel plazu
llegal d'esposición pública con cuenta de que quienes asina lo deseyen puedan
presentar suxerencies. Dende La Semiente defendemos un modelu de Planiamientu
urbanísticu al serviciu de la población del nuesu conceyu, respetuosu col mediu
ambiente y qu'encete les necesidaes esenciales en materia urbanístico d'un conceyu
con graves problemes de desempléu, con una minería a puntu de desapaecer,
con un fracasu evidente nel modelu de
reconversión minera siguida hasta'l momentu, con un índiz de población activa
batiendo récords negativos nel estáu español, con una población por demás
avieyada y con unes perdides de
población constantes nel tiempu desque s'empecipiara la reconversión minera,
que tien como unu de los sos principales factores la emigración constante de la
nuesa mocedá que se ve obligada a
llabrar el so futuru n'otros llugares. A esto habría qu'añadir problemes de comunicación cola Área Central Asturiana, el
despoblamientu galopante de la zona rural del conceyu, la esistencia de zones
degradaes, vertideros illegales y un bon
númberu de regueros que siguen virtiendo agües contaminaes al Nalón,
ente otros asuntos.
Con éses teniendo
en cuenta lo anterior, el Centru Social
La Semiente presenta les siguientes SUXERENCIES:
PRIMERA.- Magar ye verdá que, a
efectos informativos, mientres el períodu d'esposición pública d'esti Documentu
de Prioridaes fixeronse delles charres esplicatives y que’n dellos díes de la
selmana, n'hores determinaes, atendiose al públicu col mesmu fin, entendemos
qu'estes acciones nun pueden despintar
el fechu principal de qu'el PGOU ta dearrollandose
ensin un modelu claru y concretu de PARTICIPACIÓN CIUDADANA efectiva.
Entendemos que, anque tarde, tovía se ta a tiempu de desarrollar y aprobar
dichu modelu, pudiendo tomar como referencia los múltiples exemplos de
participación siguíos en bona parte de los conceyos del estáu español. Creemos
que implicar al vecindariu na so ellaboración
sería positivu pa llograr un PGOU que respuenda a los intereses de la
población y, de camín, demostrar que la DEMOCRACIA PARTICIPATIVA ye un valor
n'alza nesti Aytu.
SEGUNDA.- Nesti casu, y non se
debe de considerar como una suxerencia,
sinón como una crítica en toa riegla.
Constatamos que l'usu de la Toponimia tradicional del conceyu, oficial dende la
so publicación nel BOPA del día 7 de
febreru de 2008, el Decretu 3/2008 de 23
de Xineru, nun se respeta nun númberu
incontable d'ocasiones nos diversos documentos presentaos. Especial mención
merecen aquellos núcleos a los cualos reconocióse-yos tanto'l so nome
tradicional como'l castellán, tamos falando en concretu de Santa Bárbola/Santa
Bárbara y de L´ Entregu/ El Entrego, yá que,
nos documentos, namá s'usa'l nome en castellán, siendo oficiales ambos
y, polo tantu, en tolos documentos municipales deben d'usase los dos, tantu
l'asturianu como'l castellán. Esperamos qu'esta situación sea correxida y se
respete la toponimia oficial d'esti Conceyu.
TERCERA.- Plantéase la necesidá
de promover les esplotaciones forestales. Tando d’alcuerdu con ello, entendemos que nun se debe de cayer nel
erru de dar pie a plantíos masivos
d'especies foranies de pocu valor pero por demás agresives cola redolada, tantu
pol impactu paisaxísticu, como pola so afección sobre'l suelu, les agües y la
biodiversidá. Hasta agora la presencia
de plantíos d'ocalitos y de pinos nel nuesu
conceyu foi casi testimonial. Dende La Semiente, suxerimos qu'esa
situación debe de siguir calteniéndose, ye por ello que proponemos que nel PGOU
se recueya la prohibición de plantíos d'ocalitos y de coníferes. Pol contrariu, deben potenciase los plantíos
d'árboles autóctonos de gran valor ambiental y económicu. Amás consideramos que
la esplotación maderera debe de realizase con criterios sostenibles y
respetuosos col mediu ambiente, torgandose n'el mesmu Plan, aquelles formes
d'esplotación o técniques que nun sigan estos criterios.
CUARTA.- La esistencia de
regueros, afluentes del Nalón, que reciben virtíos d'agües fecales y otres,
provenientes, tantu de núcleos rurales,
como de les propies redolaes urbanes, faen necesariu que s'encete, obviamente en
collaboración coles alministraciones indicaes, el so saneamientu. Nesti sentíu proponemos que s'ellabore un
plan que recueya nun catálogu los regueros afectaos por esta situación, l'estáu
en que s'atopen, onde tan los focos contaminantes, etc. con cuenta de dir
encetando gradualmente la solución a esta problemática.
QUINTA.- Creemos qu'una de les
faltes de Samartín, qu'incide directamente na perda de población, ye l'ausencia
de texíu empresarial qu'en materia d'empléu pueda ufiertar una alternativa al gran volume de puestos de
trabayu amortizados col cierre de los pozos mineros, lo qu'obliga a gran parte
de la población a buscar empléu fuera
del Conceyu y en munches ocasiones fuera de la mesma Cuenca del Nalón. Con éses
l’ Área Central asturiana perfílase como la gran receptora d'esa demanda
d'empléu, Xixón, Uviéu, los polígonos empresariales allugaos nesi espaciu central de
Asturies...etc. N'esti contestu, creemos que se debe de potenciar una
alternativa pública de tresporte que, al nuesu criteriu pasa fundamentalmente
por meyorar los defectos del serviciu
ferroviariu esistente na actualidá. Los parámetros d'esa meyora deben de basase
na solución de faltes, como les frecuencies de pasu de los trenes y l'escesiva
duración de los recorríos. Resultando evidente qu'alternatives como la
propuesta del Tren-Tran nun solucionen
el problema, en cambiu paeznos más indicáu llograr l'aplicación nesti asuntu de
les recomendaciones recoyíes nel Plan Estratéxicu Comarcal del Valle del Nalón
qu'afondaben, fundamentalmente na necesidá de llograr un modelu ferroviariu
rápidu y competitivu, qu'ayudara a contribuyir a afitar población y a ser la
principal alternativa de movilidá ente la Área Central Asturiana y la Cuenca,
siendo capaz de competir y de complementase col tresporte per carretera.
Tocantes a los problemes urbanísticos xeneraos, pensamos qu'actuando
localizádamente con soterramientos puntuales, podríamos resolver los
principales problemes que xenera'l trazáu del tren al so pasu peles zones
urbanes, pudiendo ser compatibles diches actuaciones.
SESTA.-El sector del comerciu de
proximidá en Samartín, formáu fundamentalmente por pequeños comercios de la más
diversa actividá, amenazáu na so
supervivencia pola competencia de les grandes superficies comerciales,
tantu poles del centru asturianu, como pola asitiada directamente nel nuesu
conceyu y poles medianes superficies qu’abunden en toos los nuestros núcleos
urbanos, debe d'atopar nesti PGOU un ciertu grau de reconocimientu que
contribuya a la so pervivencia, yá de
por sí bien complicada. Esti sector económicu non solo contribúye a facer
ciudá, sinón que, amás, al ser los sos propietarios persones afincaes y
residentes nel conceyu contribuye directamente a l’oxetivu d'afitar población y
a xenerar actividá económica al redior suyu.
Por tou lo anterior, suxerimos que, con calter xeneral, se
determine nun autorizar nueves implantaciones en tol conceyu d'esti
tipu de superficies comerciales grandes y medianes
SÉPTIMA.- El planteamientu
efectuáu nel Documentu de Prioridaes en relación cola peatonalización del
centru de los pueblos paeznos correctu. Sin embargu, consideramos necesariu
complementar eses polítiques cola creación d'aparcamientos públicos y
gratuitos en zones afayadices pa ello,
que solucionen los problemes xeneraos pola eliminación de les places
d'aparcamientu esistentes con anterioridá.
OCTAVA.- El D.P. Concreta una serie d'alternatives pa unes
zones determinaes del conceyu. Dempués d'estudiar con detalle lo planteao
llegamos a les siguientes consideraciones:
MUMI.- Non solo debe tenese en cuenta la proximidá del MUMI a la de
contemplar les altures permitíes. La proximidá a esti espaciu de la barriada de
San Vicente y l'impactu que sobre ella y
los sos habitantes tendría l’altura de
les instalaciones que se planteen, faen conveniente, al nuestru criteriu, que
l'altura màxima permitía se reduza de cuatro a dos plantes.
TALLERES DE SANTANA- Pensamos que l'usu
residencial debe de quedar llindáu al ámbitu espacial contempláu nes actuales
N.S.P., quedando'l restu de la so superficie acutáu pa usos empresariales que
sean compatibles cola redolada urbana na que s'alluga. Amás debería d'estudiase
la posibilidá d'un paséu fluvial pela zona colindante col Ríu Villar.
POZU ENTREGU.- En casu de desarrollase
soluciones como la planteá pa esti espaciu, consideramos como requisitu que los aparcamientos que
pudieren xenerase sean de calter públicu y gratuitu y nun signifiquen una
amenorga de les places esistentes anguaño.
ZONA’L FLORÁN.- A falta d'una mayor concreción,
si lo que se plantea ye la posibilidá de baltar el Campu fútbol d'El Florán por
que n’esi espaciu pudieren desenvolvese construcciones de vivienda por axentes
privaos, yá adelantamos el nuesu desalcuerdu con tal pretensión. De llevase a cabu el derribu, entendemos que
l'alternativa pasaría, bien pola
ampliación del Parque, bien por dalgún nuevu equipamientu compatible col sitiu.
ZONA LA ISLLA.- No referente a reafitar lo
aprobao nel so día, consideramos qu'a esti respectu yá hubo apocayá un
resolvimientu del plenu y agora lo que-y correspuende a esti PGOU ye buscar un
usu compatible con esi resolvimientu.
NOVENA.- Resumiendo,
compartimos, polo xeneral, los principios rectores del PGOU que nos propón
l'equipu redactor, por eso facemos la reflexón siguiente: Nel analís que se fai
del anterior Documentu de Prioridaes
ponse de relieve la contradicción esistente ente planteao nél y lo
desarrollao darréu, como quiera qu'en
gran parte esi desarrollu posterior, absolutamente refugable pela nuesa
parte, vieno dáu pola intervención de
los Servicios Técnicos Municipales encabezaos pol equipu de gobiernu d'aquellos
momentos, teniendo en cuenta qu'esos servicios técnicos municipales son les
mesmes persones y que l'equipu de gobiernu actual respuende al mesmu partíu que
defendía esi indeseáu modelu de desarrollu, manifestamos la nuesa esmolición
pol fechu de que pudiéramos repitir la
mesma hestoria, de manera que, a la fin del procesu, atopáramos con un PGOU nel
que cualquier paecencia cola filosofía que s'esprende d'esti Documentu de
Prioridaes sea una mera coincidencia.
L´Entregu a 20 de
Marzu de 2013
Esti Miércoles, coincidiendo col mercáu entreguín semanal, integrantes
del Centru Social Autoxestionáu La Semiente, fizimos un actu de protesta
ya informativu, sobre l'edificiu El Cafetón o Casa Viña
