Llamáu a la solidaridá, llamáu a la LLUCHA!

Dende'l Centru Social La Semiente, faemos un llamamientu al pueblu de la cuenca del Nalón a solidarizase colos compañeros acampaos nel parque Vieyu de La Felguera, contra los despidos en D.F., contra'l zarru de los talleres de Barros de D.F. L'acampada va dende'l día 20, hasta'l 28, de setiembre, y nun se trata d'una cabezonería más. Trátase d'amosar que somos capaces d'aguantar, de nun resignanos de nun agachar la cabeza y meter el rabu ente les pates. Trátase de demostrar qu'entá somos munches les que tenemos arguyu de clase y que somos conscientes de quien son los responsables d'esta situación, y de que non, nun van callanos y vamos enseñar los dientes. A l'acampada sumémonos distintos colectivos y persones, porque entendemos que la llucha d'unu ye la llucha de toos, y por que los problemes nun son aisllaos nin tienen soluciones aisllaes, asina lo entendimos xente como La Semiente que xunto concompañeros de D.F. quedamos ayeri a durmir colos dos despidíos, o asina lo entienden el trabayadores de Liberbank (Cajastur), qu'ayeri nos tuvieron poniendo al corriente de la estafa de la banca y el gobiernu asturianu, asina lo entienden tamién los sindicalistes colombianos de CUT  abelugaos en Asturies que tamién participaron de l'acampada y de la charres, asina lo entienden el colectivu de Parades y Trabajadores Precaries d’Asturies, y el colectivu de la enseñanza pública, o los trabayadores  , “veteranos” de les lluches de Duro-Felguera, compañeros n'activu de la Duru, trabayadores de TEDESA (subcontrata de Duro), trabayadores de Tenneco….les compañeres del F.U.S.O.A. del Centru Social Sestaferia, de Picu Rabicu… porque la llucha d'unu ye la llucha de toos.
Queremos animar a aquelles persones que como nós nun se resigna y nun va siguir tolerando más que nos pisen, que manden d'un plumazu los derechos conquistaos a base de sudu, sangre, llarimes, represión y enforma esfuerzu, que nun va tolerar mas esta estafa que nos venden; y queremos convidavos a xuntase a les concentraciones que tolos díes se fain a les 19:30h nel Parque Vieyu de La Felguera y a les charres que distintos colectivos sociales y llaborales realicen tolos díes dempués de cada concentración, y claro tá, a participar na manifestación d'esti sábadu 28 de setiembre, dende'l Parque Vieyu de La Felguera hasta la Casa Conceyu de Llangréu, en Sama, col lema CONTRA LOS DESPIDOS Y PIESLLES DE TALLERES EN DURO-FELGUERA. CONTRA L'ESMANTELAMIENTU DE LES CUENQUES Y DE ASTURIES. ¡NIN UN PARÁU, NIN UNA PARADA, NIN UN ZARRU D'EMPRESA MÁS!.
Yá ye hora d'espertar!! Y si nun espertáis queríos vecinos…. A lo menos dexái de cuntar batallines d'esa cuenca lluchaora y revolucionario de la que güei apenes queda nin rastru. Del mitu nun se vive y la pasividá mátanos.
Esperemos, que cada vez síamos más quien colos pies nel presente y el futuru sepamos faenos valedores del heriedu lluchador d'esti valle. Pola cuenta que nos trai.
NUN LLORES, LLUCHA!!!
La manifestación esta convocada conjuntamente por Sindicatos de Clase y Colectivos Sociales: CONVOQUEN: CSI, CGT, SUATEA, CENTRU SOCIAL LA SEMIENTE, FUSOA, COLECTIVU DE PARADS Y PRECARIS DE ASTURIES, ASOCIACIÓN PICU RABICU, CENTRU SOCIAL SESTAFERIA, ASOCIACIÓN ALAMBIQUE.

¿Qué ye la F.I.J.L? Propuestes pa la organización de la mocedá llibertario.

La xente del Grupu Anarquista Grisú, entama pa esti xueves día 12 de setiembre una charra col títulu "¿Qué ye la F.I.J.L?.  Propuestes pa la organización de la mocedá llibertario". Nélla la xente interesao podrá conocer un poco más sobre la Federación Ibérica de Juventudes Libertarias, del so furrulamientu, de les sos propuestes y del so trabayu.
La charra va ser a les 19:30h nel Centru Social La Semiente, C/ Eladio garcia Jove nº6 de L'Entregu.

"Anarcosindicalismu: Propuestes pa l'acción." (Charra/alderique)

Enfrentámonos a tiempos difíciles pa la clase obrera. La crisis, endémica en munches contornes asturianes, amenaza con barrer los derechos qu'entá caltenemos y suminos na absoluta miseria. Muncha xente empieza a abrir los güeyos por fuerza y munchos más van vese emburriaos a defender los sos medios de subsistencia y a preparar alternatives al sistema capitalista.

Nesti contestu enmárquense una serie de charres que nel mes de xunu van tener llugar n'Asturies, onde se tocaren les formes y formules d'organización anarcosindicalistas (teoría y practica diaria, conceutos, etc.), los principios y formes d'ación (ación directa, boicó...), l'ación sindical na cai y na empresa...

L’anarcosindicalismu funde los sos raigaños no más fondo de la clase obrera y non solo ufierta métodos de llucha que nos sirven pa enchir el modelu sindical actual, ademas propón alternatives clares al modelu capitalista de producción y distribución de la riqueza.

Por ello los ponentes de la charra llámamente/nos a asistir a les charres y a arriquecer el posterior alderique para ente toos dir texendo esa sociedá nueva que tanto precisamos. La cita en L'Entregu va ser el xueves día 6 a les 20:00h y y nella van participar dellos militantes de la C.N.T. 

Día interancional de les Lluches Campesines

L'Entregu va acoyer los actos centrales de celebración del Día Internacional de les Lluches Campasiness (17 d'abril).

Diversos colectivos sociales asturianos (La Semiente, Soldepaz Pachakuti, 15M, Cambalache, Ecoloxistes n'Aición, Picu Rabicu, COSAL…) sumaron esfuerzos pa entamar distintes actividaes lúdiques y culturales en redol a los peligros de la sociedá de consumu y los sos posibles alternatives.

L'actu central de celebración va tener llugar el sábadu 20 d'abril nel parque d'El Cotu d'L'Entregu (en casu d'agua va treslladase a la plaza abastos) y va consistir nun mercáu de productos ecolóxicos, artesanales y locales, onde va haber degustaciones, xuegos, teatru na cai... Amás, esti mercáu va ser, en sí mesmu, una performance: va representar una especie d'aldega gala como metáfora de l'alternativa y resistencia que suponen los pequeños llabradores, productores ecoloxistes, grupos de consumu responsable, tiendes de comerciu xustu… frente a la sociedá de consumu (Roma) apoderada poles grandes multinacionales y superficies comerciales. Si vos arrimais, de xuru vais poder charrar con Astérix o Obélix, o inclusive tastiar la pócima máxica de Panorámix.

Pero la celebración va empezar un día antes, el 19 d'abril a les 18:00 hores, nel Centru Social de xubilaos d'L'Entregu, con charrar-coloquiu “Descolonizando el territoriu”, moderada por Javier Orozco (Coordinador del Programa Asturianu de DD.HH-Colombia) y na que van intervenir María José Llera (Relaciones Internacionales del SAT) y Eberto Díaz Montes (Presidente de FENSUAGRO-Colombia y Representante de Vía Campesina Internacional).

Yá'l sábadu 20 d'abril, día del Mercáu Galu, va abrise la xornada a les 11:00 hores nel mesmu Centru Social d'L'Entregu, cola mesa redonda “Ecoloxía de saberes: intercambiu de propuestes populares, llabradores, solidaries”, moderada por Beatriz Viado (periodista) y na que van intervenir miembros de distintos colectivos (SAT, Vía Campesina, La Semiente, 15M, SLG, etc.).

Soberanía alimentaria, agricultura ecolóxica y local, naturaleza, salú, dignidá llaboral… son conceutos que van llexar nel ambiente festivo d'esta conmemoración del Día Internacional de les Lluches Campesines que, per primer vegada, va tener un eslogan galu: “Si quies, non tolos caminos van pa Roma”.

El SAT n'Asturies. "La Experiencia Andaluza"

Tomes de tierres, marches obreres por toa Andalucía, espropiación y repartida d'alimentos, encierros n'oficines del INEM, innumberables fuelgues y manifestaciones… El Sindicatu Andaluz de Trabajadores, SAT, ye un exemplu de llucha pa tolos colectivos sociales y movimientos sindicales del Estáu.

Y, como nun podía ser d'otra manera, esa llucha punsolos nel puntu mira de la represión y la criminalización. Asina, el SAT ye'l sindicatu más represaliáu d'Europa con pidimientos de cárcel de cerca de 50 años, 400 compañeros y compañeres procesaes y 400.000 euros en multes.

A lo llargo esta selmana vamos cuntar cola presencia n'Asturies de Lola Álvarez y José Caballero, que van falanos de les distintes estratexes de llucha del SAT, de la dura represión y del trabayu que queda per delantre.

Los actos van ser a lo llargo de tres díes en Xixón, L’Entregu y Uviéu, y tres cada un d'ellos entamarase una cena solidaria col fin de pañar fondos pa la caxa resistencia de les compañeres y compañeros del SAT. Amás, mientres toles xornaes van recoyese autoinculpaciones dientro la campaña solidaria poles acciones de los supermercaos.

Lola Álvarez ye responsable del SAT en Córdoba y vocera de la ocupación de la finca de Somonte. José Caballero ye secretariu d'Organización del SAT y foi unu de los deteníos tres l'acción d'espropiación d'alimentos en Mercadona.

El calendariu d'actividaes ye'l siguiente:

Miércoles 21 a les 19h nos locales de la CSI (C/ Sanz Crespo 3 bj, Xixón) charra-alderique. A les 22h nel CS Sestaferia (C/ Joaquín Alonso Bonet 7, Xixón) pinchéu solidariu.

Xueves 22 a les 20h nel CS La Semiente (C/ Eladio Jove 6, L’Entregu) charra-alderique, y a les 22h pinchéu solidariu.

Vienres 23 a les 20h nel local cambalache (C/Martínez Vigil, 30 bj, Uviéu) charra-alderique. A les 22:30h en L’Arcu la Vieya (C/Postigo Altu, 14 bj, Uviéu). Cena solidaria.

Entamen: CS La Semiente, CS Sestaferia, CSI, Picu Rabicu, L’Arcu la Vieya y Cambalache.

II Amagüestu de La Semiente.

El vienres día 26, la seronda va ser la protagonista una vegada mas nes actividaes del C.S. La Semiente, con un amagüestu. Tradición viva entá anguaño y que tien los sos oríxenes nuna antigua celebración celtica venceyada a lo que güei conocemos como “día de los muertos” o “de tolos santos”, lo que yera'l Samhain, y de lo qu'entá güei en munches aldegues d'Asturies caltiense la tradición de poner calabaces agüecáes con forma de cabeza pelos caminos o en fuera les cases. Anque paeza mentira, esti iconu de les calabaces vuelve agora a los nuesos llares non por recuperación de parte de la nuesa cultura, si non por influencia del consumismu americanu; cola so propia versión del halloween, qu'estos díes va anubrir de fiestes munchos pubs en forma de promociones y demás y que pocos o nengún van rellacionar col nuesu tradicional amagüestu y nueche de los muertos.

Amagüestu La Semiente pa neños na Plaza Abastos 2011

Esta segunda edición del amagüestu de La Semiente va trescurrir de la mesma forma que la pasada edición. Va haber una versión pa los mas pequeños, y otra pa los yá non tan pequeños. A les 18:00h n'El Parque La Llaguna de L'Entregu (o na PlazaAbastos si lloviera), van repartise castañes y sidra duce a los asistentes. Tamién va haber un mayu tradicional y un llagar, pa que los neños esfruten mayando y conozan un poco de la nuesa cultura tradicional y dú vien un productu tan natural y tan nuesu como ye la sidra. Tamién van tener otres actividaes rellacionaes coles manualidádes. Dempués a les 21:00,h l'amagüestu treslladarase a la cai Eladio Jove, al interior del C.S. La Semiente, onde va haber un escenariu abiertu nel que se va a entemecer, poesía, monologo y música. L'añu pasáu foi un ésitu de participación asina que toes la persones que quieran mostrar el so arte o namás comer unes castañes y tomar daqué nun tienen mas que dir. Una de les novedaes d'anguaño ye que tamién se podrá esfrutar de les castañes acompañaes de Cerveza Caleya, una nueva forma d'esfrutar del amagüestu con una cerveza artesanal de calidá, produco por dos miembros del colectivu de La Semiente.

Toles actividaes son gratuites y convidamos a tol mundu a participar y esfrutar. Tamos en Centru Social La Semiente, C/ Eladio Jove, 6, L´Entregu (lasemiente@hotmail.com)