miércoles, 30 de noviembre de 2011

Soberanía Alimentaria en La Semeinte


Coincidiendo cola proximidá del DIA MUNDIAL DE LA SOBERANIA ALIMENTARIA, el Centru Social La Semiente abre la so programación d'avientu con una charra col titulu de Soberanía Alimentaria. La ponencia que va ser el xueves día 1 a les 20:00h. Va correr  al cargu d'Eva, del Grupu de Consumu del colectivu Cambalache d'Uviéu, y de Rizos, que pertenez al proyectu de comerciu xustu Picu Rabicu de Xixón. Nel posterior alderique va intentase perfilar un poco'l Grupu de Consumu que dende La Semiente quier impulsase na cuenca del Nalón.

miércoles, 23 de noviembre de 2011

El Centru Social Autoxestionáu La Semiente sofita al CSO La Madreña

SOFITAMOS LA RECUPERACIÓN CIUDADANA CON FINES SOCIALES DEL EDIFICIU DE L'ANTIGUA CONSEYERÍA DE SALÚ, EN GENERAL ELORZA.

El pasáu 15 de Noviembre'l movimientu 15-M fixo pública la ocupación de l'antigua Conseyería de Sanidá de General Elorza, denunciando la complicidá de les alministraciones públiques colos grandes promotores inmobiliarios.

En 2007, los gobiernos autonómicu y local, convirtieron en suelu residencial trés esquiñones públiques, incluyendo les conseyeríes de la cai Xeneral Elorza (Sanidá y Bienestar Social). Estos terrenos fueron vendíos a la constructora SEDES. Yera la manera de financiar la escandalosa compra pública por 59 millones d'euros de dos ales del “Calatrava” a la empresa “Jovellanos XXI” pal treslláu de les oficines de les conseyeríes. Estos 59 millones d'euros del presupuestu del principáu, taben faciendo rentable la edificación a esta empresa, propiedá de los multimillonarios José Cosmen Adelaida -fundador de ALSA-, y Alberto Lago – constructor-. Según un informe de la Sindicatura de Cuentes d'Asturies del 1 d'abril de 2009, la operación saltó la llegalidá, al nun recibir l'aprobación del Parlamentu autonómicu, como esixe la Llei de Patrimoniu.

Abandonáu ya inutilizáu mientres 4 años, l'edificiu recuperáu pol 15-M diba ser inminentemente baltiáu pa construyir nel so llugar viviendes de luxu, a 3.600 € el m2.

Sicasí, esos equipamientos fueron una pilastra de la vida de los uvieinos mientres décades. Miles de persones recibieron atención nes Conseyeríes de Sanidá y Bienestar Social (“La gota  leche”). Por ello, los colectivos social y vecinal reclamaron mientres años, con campañes como “Salvemos Pumarín”, qu'onde había un equipamientu públicu debía de siguir un centru de servicios múltiples.

Los colectivos, movimientos sociales, asociaciones y persones firmantes creemos que ye necesariu recuperar un espaciu públicu arrebatáu pola especulación. Nun queremos “pelotazos” urbanísticos nin pisos de luxu pa una minoría. Otra manera, creemos fundamental que l'urbanismu tien de tar al serviciu de les persones. Tamién vemos necesaria la busca d'una solución pa los miles de families desanunciaes de les sos cases inxustamente por unes lleis que favorecen a los bancos frente a les persones.

Por tolo anterior, SOFITAMOS la recuperación ciudadana de l'antigua Conseyería de Salú de General Elorza y la creación d'un espaciu social y cultural xestionáu asambleariamente polos movimientos sociales, culturales y vecinales d'Uviéu, abiertu a múltiples actividaes: esposiciones, talleres, alderiques, conferencies, teatru, poesía, música…

Frente a la especulación y l'abandonu de los edificios que fueron siempres públicos, RECUPERACIÓN, ESPACIOS SOCIALES Y LLUGARES D'ALCUENTRU CIUDADANU.

martes, 22 de noviembre de 2011

Cebollles Rellenes, esposiciones, performances...


El Centru Social La Semiente tien preparada la so programación especial coincidiendo cola festividá local de Les Cebolles Rellenes de L’Entregu. El miércoles día 23 a les 19:00 nel mesmu Centru Social va tener llugar la inauguración de la esposición pictórica “Puente sobre Estigia” (Entre la luz y el miedo), de l'artista blimeína Mariam González Fanjul, que va tar espuesta al publicu hasta'l día 1 d'avientu. Les visites van ser dientro del horariu d'apertura al públicu del centru.
El sábadu día 26 a les 13.00h del mediu día, hai programada una performance na Plazoleta La Ilgesia de L’Entregu que va tratar la tema de la incineración de residuos y otros problemes medioambientales, pero centrándose na futura planta incineradora prevista pa construyir en Serín. L'acción artística va correr de la mano de persones pertenecientes al movimientu 15M Asturies, que vienen representándola por distintes localidaes. A les 13.:45h yá nel Centru Social La Semiente, va haber una “sesión vermú” mas conocida como “Sesión Culete” pa que toles persones que coincidiendo con Les Cebolles anden  per L’Entregu pasen a tomar daqué y a conocer un pocu meyor el proyectu de La Semiente.

miércoles, 16 de noviembre de 2011

“Abstencionismu Activu y alternatives a la Democracia Parlamentaria”. Charra y alderique


Siguiendo cola programación de payares, el Centru Social La Semiente tráinos una nueva charra rellacionada col periodu electoral nel que tamos. Si la selmana pasada foi la vez de Miguel Angel Presno Linera, Catedráticu de Derechu Constitucional pola Universidá d'Uviéu que faló sobre los rellabicos de l'actual Llei Electoral, esta selmana tóca-y el vez a una opción cada vez mas siguida, l'astencionismu activu, que pa nada tien que ver col astencionismu apáticu y conformista. A partir de les 20:00h de la tarde, los colectivos anarquistes Grisu y Orbayu van ser los encargaos de dar esta conferencia y abrir el posterior alderique, que lleva por nome “Abstencionismu Activu y alternatives a la Democracia Parlamentaria”.  Dicha actividá va ser nel mesmu Centru Social Autoxestionáu La Semiente, nel númberu 6 de la cai Eladio Jove de L’Entregu.

A partir de les 5 30 el Centru va tar abiertu, tando a la vuesa disposición la nuesa biblioteca, llibre y gratuita.

jueves, 10 de noviembre de 2011

Audio de la presentación de “Feminismo para no feministas, la Vane contra la Partrix”

Audio de la presentación del llibru de Rosario Hernández Catalán, “Feminismo para no feministas, la Vane contra la Partrix”, l’ultimu trabayu d'esta dramaturga y ensayista llangreana. Un manual d'urxencia pa toes eses moces qu'en plenu sieglu XXI siguen perdíes victimes d'un submundu cá vez más esteriotipáu. Que va poco presentose nel Centru Social La Semiente.
La xente que nun tebo pue escuchalu equí
Recordavos que si quereis un exmplar gratuitu del llibru nun teneis más que pasar pel centru Social La Semiente.

martes, 8 de noviembre de 2011

Como furrula la Llei Electoral. Charra

Esti xueves a les 8 la tarde, nel Centru Social Autoxestionau La Semiente (C/ Eladio Garcia Jove Nº6 L'Entregu) vamos tener como invitau d'esceción a Miguel Angel Presno Linera, Catedráticu de Derechu Constitucional pola Universidá d'Uvieu y collaboraor cola acampá del 15 M de Siero, que va cuntanos como funciona la Llei electoral, de cara a que, el que vote sepa con que sistema lo fae y les sos trampes pa favorecer el bipartidismu.

PER OTRU LLÁU LES PERSONES INTERESAES NEL TEMA PUEN DESCARGAR LLIBREMENTE UN LLIBRU DE MIGUEL ANGEL PRESNO LINERA QUE FALA DEL TEMA. CALCANDO EQUÍ

A partir de les 5 30 el Centru tará abiertu, tando a la vuestra disposición la nuesa biblioteca, llibre y gratuita.

La Semiente
Semando güei, pa tener un mañana

miércoles, 2 de noviembre de 2011

En Payares "Cebolles, Nabos, Pimientos y.... Elecciones!"

 Ya tenemos les actividaes pa Payares, nesti mes, a parte de fartures gastronómiques y de campaña (recomendamos les primeres...) vamos tener 3 charres los xueves, a partir de les 8 la tarde:

- El día 3 de Xeopaties y Bioconstrucción, a cargu del Colectivu Ultravioleta

- El día 10 descubriremos tolos secretos de la lley ellectoral y "eso" que llamen democracia, cola ayuda de Miguel Angel Presno Linera, profesor de Derechu de la Universidá d'Uvieu

- Pa cerrar el día 17, los colectivos anarquistes de Asturies Grisu y Orbayu, van falanos del abstencionismu activu y habrá un alderique sobre algunes alternatives a la "democracía" parlamentaría.


Pero nun acaba aquí, tolos miercoles continuamos colos ciclos de cine, y además tendremos el Sabado 26 coincidiendo coles fiestes del pueblin, una Performance nomá "La Incineradora" por xente del 15M de Xixón y una Sesión Vermú (con artistes sin confirmar pol momentu) nel Centru Social. Tar atentos, que va ser gorda, y ya vos contamos más.

Por último, pero no menos importante, el Centru Social La Semiente, ta abiertu al públicu en xeneral, tolos miercoles y xueves a partir de les 17 30, con una biblioteca llibre y gratuita, pal deleite de cualquier interesau na llectura, tenemos llibros de tolos gustos, olores y sabores.

A QUE ESPERES??? VEN A CONOCENOS!

Centru Social Autoxestionau La Semiente
Lo que queramos que seya!